Brexit “zhytet” në krizë – Britania mund të thyejë ligjin ndërkombëtar duke injoruar traktatin
Britania i çoi bisedimet për Brexit në krizë këtë javë, pasi pranoi se mund të thyejë ligjin ndërkombëtar duke injoruar disa pjesë të traktatit, ç’ka nxiti konflikt me ekzekutivët e BE. Londra, pasi hodhi poshtë paralajmërimet e Brukselit se po rrezikon paktin tregtar, deklaroi se do të injorojë një pjesë të marrëveshjes së divorcit, që u nënshkrua në Janar.
Presidentja e komisionit, Ursula von der Leyen, shkroi në Twitter se është shumë e shqetësuar. “Kjo do të thyejë ligjin ndërkobmëtar dhe përkeqësojë besimin. Marrëveshjet duhen mbajtur. Ky është themeli i çdo marrëdhënieje”, -shkroi ajo. Publikimi i ligjit, një ditë përpara se shefi i negociatave të BE të mbërrinte në Londër për bisedimet tregtare, sugjeron se kryeministri Boris Johnson po përpiqet të nxisë bllokun që të mos pranojë negociatat. Johnson tha në parlament se ligji përbën një rrjet të sigurisë ligjore për të mbrojtur vendin kundër interpretimeve esktreme të protokollit të Irlandës së Veriut, që mund të kërcënojë paqen në provincën britanike.
Ligji, nëse miratohet, do t’i japë ministrave fuqinë për të injoruar pjesë të protokollit duke modifikuar formularin e deklarimit të eksporteve dhe procedura të tjera të daljes. Ligji thekson se Britania mund të mos aplikojë dispozitat, përfshirë ato që lidhen me Irlandën e Veriut dhe ndihmat shtetërore. Ekipi i Johnson i sheh ndihmat shtetërore si një mjet thelbësor për të nxitur firmat e teknologjisë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.