Britani e Madhe – Kush do të udhëheqë vendin ndërkohë që Boris Johnson ndodhet në spital?
Është pikërisht Dominic Raab i cili u katapultua në Dowing Street në mes të emergjencës së Koronavirusit. Kushtet e përkeqësimit të Boris Johnson, të shtruar në spital në kujdesin intensiv, e bënë Ministrin e Jashtëm dhe sekretarin e parë të kryeministrit, udhëheqës të shtetit de fakto në një nga momentet më të vështira në historinë britanike.
Zyra e Johnson konfirmoi se Raab “do të marrë vendin e kryeministrit kur është e nevojshme”, duke kryesuar mbledhjet tani virtuale të qeverisë dhe takimet e përditshme Cobra, komiteti i urgjencës. Sipas ekspertëve mjekësorë, do të duhen javë të tëra që Johnson të jetë në gjendje të kthehet në punë.
Kthesë e papritur
Është një pikë kthese e papritur dhe e paparashikueshme për një politikan tejet ambicioz, i cili deri më tani nuk ka qenë në vijën e parë dhe i cili njihet gjithashtu në Britani mbi të gjitha si një mbështetës i zjarrtë i Brexit.
Bir i një refugjati hebre
Raab, 46 vjeç, është djali i një refugjati hebre çekosllovak që kishte ikur nga nazistët në vitin 1938. Pasi u diplomua në Oksford me një diplomë juridike dhe një diplomë Master në Kembrixh, ai punoi si avokat fillimisht në sektorin privat dhe më pas në Ministrinë e Jashtme, i specializuar në padi kundër kriminelëve të luftës në gjykatën e Hagës.
Ai hyri në politikë në vitin 2010, u zgjodh deputet për zonën elektorale të Esher dhe Ëalton, një periferi e pasur e Londrës, në zgjedhjet që kishin shënuar një fitore të madhe për partinë konservatore të drejtuar nga David Cameron.
Në Parlament, Rahab shpejt fitoi një reputacion si një “djalë i ashpër”, duke kundërshtuar ashpër Bashkimin Europian dhe u vendos në të djathtë të partisë.
Ai kishte ngjallur zemërimin e Ministres së atëhershme të Brendshme, Tereza May, pasi i kishte përshkruar feministët si “bigots urrejtës”, duke pretenduar se ishin burrat ata që trajtoheshin padrejtësisht. Ai është gjithashtu një “djalë i ashpër” në jetën private, krenar për rripin e tij të zi në karate. I martuar me një braziliane, drejtuese e një ndërmarrje marketingu, dhe me dy fëmijë.(ilsole24ore)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.