Britani, zgjedhje më 8 qershor – May befason, synon të forcojë mazhorancën

Theresa May ka surprizuar të gjithë duke lajmëruar zgjedhje të parakohshme në datën 8 Qershor. Deklarata ka zënë në befasi edhe tregjet që kanë reaguar ndjeshëm para dhe pas lajmërimit të kryeministres.

Vazhdimisht gjatë qeverisjes së saj, Theresa May ka përjashtuar idenë e zgjedhjeve të parakohshme. May shfrytëzon në këtë mënyrë sondazhet që e nxjerrin partinë konservatore në avantazh të ndjeshëm ndaj rivalëve laburistë, me më shumë se 20% diferencë. Ajo synon që të marrë një mbështetje edhe më të gjerë duke përshpejtuar procesin e daljes së vendit nga Bashkimi Europian.

“Brexit është në interesin kombëtar, por partitë e tjera e kundërshtojnë”-deklaroi ajo gjatë njoftimit të pazakontë në Downing Street. Njoftimi tregon se, May nuk mund të kalonte ligjin e Brexit në parlament me një mazhorancë të brishtë, të trashëguar nga David Cameron.

“Në Westminster duhet të ketë unitet, por në vend të kësaj, ka ndasi. Vendi po bashkohet, por jo parlamenti”-deklaroi ajo. Ligji i vitit 2008, parashikon vetëm dy skenarë për zgjedhje të parakohshme, dhe asnjë nga këta skenarë nuk i lihet vullnetit të lirë të ekzekutivit.

Kjo do të thotë se, me shumë gjasa, Theresa May do të çojë në parlament një mocion mosbesimi për qeverinë dhe atë vetë, ose do të ndryshojë ligjin e vitit 2008.

Sa i përket Brexit, ajo deklaroi se, nuk do të ketë asnjë ndryshim në plan. Monedha britanike humbi ndjeshëm terren përpara fjalimit të kryeministres, ndërkohë që kurba mes paundit dhe euros mori një rrjedhë të paprecedentë pas fjalimit.

Paundi jo vetëm që rikuperoi humbjet, por u rrit edhe përtej nivelit të mëngjesit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.