Britania, 2 miliard paund për artet – Mbështetje për të përballuar krizën. Ministri i kulturës: Duhet ta ruajmë artin
Kriza e shkaktuar nga covid-19 ka goditur thuajse çdo aspekt të jetës sonë në shumë drejtime. Distancimi social ka frenuar jo vetëm aktivitetet tona të përditshme, shkollën, punën, ekonominë, por edhe argëtimin, si sportin apo artin, të cilat ndër të tjera gjenerojnë miliona e miliarda dollarë. Britania e Madhe ka vendosur kështu të mbështesë artin me plot 2 miliardë paund. Këtë gjë e ka bërë të ditur vetë ministri i kulturës në vend, Oliver Dowden.
“888 milionë paund do të jenë në formë grantesh, rreth 200 milionë në formë huaje, për shuma mbi 1 milionë paund. Do të ketë kushte kredie shumë favorizuese, afat-gjatë si dhe me interesa mjaft të ulta. Do të ketë mbi 100 milionë paund edhe për Skocinë, Wellsin dhe Irlandën e Veriut për t`i mbështetur. Do të injektohen gjithashtu para në institucionet e mëdha kulturore, në media apo sporte. Pra, në vende si Muzeu britanik, Muzeu Victoria & Albert, galeria kombëtare, etj”-deklaron ministri britanik i Kulturës.
“Këto janë të gjitha para të reja për sektorin e artit. Dhe artet janë zemra absolute e jetës sonë kombëtare, si në rast se është teatri i zonës tënde apo një pjesë e historisë kombëtare, nga Shakespeare te Ed Sheran. Është thelbësore qe ne ta ruajmë atë”-shtoi Dowen, duke dhënë kështu një shembull ideal se menaxhimi i krizës nuk duhet të injorojë sektorë të ndryshëm të jetës sonë, të cilët mund të cilësohen si periferikë nga politikbërësit.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.