Britania ashpërson më tej masat. Përpiqet të frenojë rastet me variantin e ri të koronavirusit
Qeveria britanike deklaroi se pjesë të mëdha të Anglisë do të vendosen në masat më të ashpra të karantinës së Covid-19, ndërkohë që variant i ri i koronavirusit po përhapet shpejtë. Britania raportoi thuajse 40,000 infeksione të reja në 24 orët e fundit, ndërkohë që varianti i ri i virusit, që është 70% më i transmetueshëm se origjinali, solli rritjen e rasteve dhe shtrimeve në spitale. Numri i vdekjeve ishte gjithashtu më i larti që prej muajit Prill, në 744.
“Kundrejt rritjes së infeksioneve, shtrimeve në spitale dhe vdekjeve nga koronavirusi, është e rëndësishme që të veprojmë. Nuk mund të kemi Krishtlindjet që njerëzit shpresonin”- tha ministri i Shëndetësisë, Matt Hancock. Fundjavën e kaluar, masa të ashpra të distancimit social u prezantuan në Londër, Anglinë Jugore dhe Uells, ndërsa planet për të zbutur rregullat për Krishtlindje u anuluan. Hancock tha se nga 26 Dhjetori, më shumë pjesë të Anglisë Jugore do të shtohen në nivelin më të lartë të kufizimeve.
Qeveritë në Skoci dhe Irlandën e veriut kanë lajmëruar se kushdo që jeton në këto zona, do të jetë subject i nivelit më të lartë të karantinës pas Krishtlindjeve. Hancock tha se ka mesatarisht 1909 shtrime në spital çdo ditë, me 18,943 që ndodhen aktualisht të shtruar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.