Britania ka “dështuar rëndë” me pandeminë / Ish-këshilltari i Johnson flet për keqmanaxhimin e krizës në zanafillë
Ish-këshilltari i kryeministrit britanik Boris Johnson, tha se qeveria ka dështuar në krizën e Covid-19 dhe se ra poshtë standardeve që publiku duhej të priste gjatë pandemisë më të keqe në dekada. Me thuajse 128,000 vdekje, Mbretëria e Bashkuar ka numrin e pestë më të keq në botë dhe kryeministrit Johnson i’u desh kohë për të vlerësuar rëndësinë e kërcënimit nga virusi në fillim të vitit 2020.
Dominic Cummings, strategu i fushatës së Brexit në vitin 2016 dhe i fushatës së Boris Johnson në vitin 2019, tha se qeveria britanike ishte shume e ngadaltë në vlerësimin e krizës. Sipas tij, Perëndimi dështoi të kuptojë përmasën e krizës dhe në Shkurt të vitit të kaluar, zyra e Johnson nuk ishte fare në alarm, ndërkohë që shumë ministra, përfshirë vetë Johnson, ishin me pushime, me dusa duke bërë ski. “E vërteta është se disa ministra kryesorë, këshilltarë të lartë si unë, dështuan në mënyrë katastrofike për të arritur standardet që publiku duhej të priste nga qeveria në një krizë si kjo”- tha Cummings. Zyrtarët britanik, sipas tij, dështuan të marrin leksionet e para të Covid nga Azia, si dhe ishin këmbëngulës ndaj ideve të reja nga shkencëtarët. Johnson ka pranuar se janë bërë gabime, por ministrat e tij thonë se po punonin në ritëm gjatë krizës më të madhe publike të shekullit. Johnson ka theksuar suksesin e programit të vaksinimit në Britani, që ka lejuar ekonominë të rimëkëmbet përpara vendeve homologe.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.