Britania kolapson në tremujorin e dytë. Goditje historike nga Covid-19, ekonomia tkurret me 20%
Britania ka pësuar një kolaps rekord ekonomik në tremujorin e dytë 2020, kur ishin në fuqi masat e karantinës së koronavirusit dhe njerëzit nuk kishin mundësi për të shpenzuar. Produkti i Brendshëm Bruto u tkurr me 19.8% në tremujorin e dytë, nga i pari. Kjo normë ishte më e ulët se 20.4% që u vlerësua fillimisht, por është ende më e larta se në çdo ekonomi tjetër të zhvilluar, sipas zyrës së Statistikave në Londër.
Tkurrja ekonomike ishte më e madhja që kur nisën regjistrimet në vitin 1955. Ekonomia britanike ishte tkurrur me 2.5% në tremujorin e parë, pasi vendi hyri në karantinë në fund të muajit Mars. Familjet kanë kursyer një normë rekord prej 29.1% të të ardhurave të tyre në tremujorin e dytë, në rritje nga 9.6% në tremujorin e parë, ndërkohë që nuk patën mundësi të shpenzojnë në dyqane dhe restorante, pavarësisht se të ardhurat u mbështetën nga skema e Qeverisë për mbrojtjten e vendeve të punës Britania ka normën më të lartë të vdekjeve nga koronavirusi në Europë, me mbi 42,000.
Me bazë vjetore, produkti i brendshëm bruto i Britanisë ra me 21.5%, shifër e ngjashme me Spanjën, ndërkohë që Franca raportoi rënie me 19%. Ekonomia është rimëkëmbur ndjeshëm që prej heqjes së karantinës në muajin Maj. Megjithatë, Banka e Anglisë ka paralajmëruar se rimëkëmbja pritet të humbasë vrull dhe norma e papunësisë pritet të rritet në 7.5% këtë vit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.