Britania mbështet cigaret elektronike – Studimi tregon se ndihmon mijëra britanikë që të lënë duhanin

Cigarja elektronike ka ndihmuar dhjetëra mijëra britanikë  çdo vit që të lënë duhanin, sipas një studimi që vë në dukje qasjen më tolerante të Mbretërisë së Bashkuar krahasuar me Shtetet e Bashkuara.

Rreth 70,000 duhanpirës britanikë po heqin dorë çdo vit duke e zëvendësuar me cigare elektronike, sipas raportit të Kolegjit Universitar të Londrës. Studimi analizon rritjen e përdorimit të cigareve elektronike që prej vitit 2011 dhe shfaq një korelacion të fortë me rënien e nivelit të pirjes së duhanit që prej atëherë.

Raporti vë në dukje një ndryshim të madh në qasjen kundër cigares elektronike mes Shteteve të Bashkuara dhe Britanisë. Shumë shtete dhe qytete në SHBA kanë limituar aksesin e aparateve të reja, pas më shumë se 1,000 raste të sëmundjeve të lidhura me substancat që përmbajnë cigaret elektronike.

Rastet e sëmundjeve nuk kanë qenë kaq të përhapura në Europë dhe autoritetet e shëndetësisë në Britani kanë përsëritur komentet e tyre se cigarja elektronike është më pak e dëmshme se cigarja tradicionale.  Të dhënat e studimit janë bazuar te qindra mijëra duhanpirës nga 2006 në 2017-ën dhe kanë trajtuar përpjekjet e tyre për të lënë duhanin dhe nisur cigaret elektronike.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.