Britania, në marrëveshje për vaksinën. Siguron 90 milionë doza nga Pfizer/BioNTech dhe Valneva
Britania ka arritur marrëveshje për të siguruar 90 milionë doza të 2 vaksinave eksperimentale të Covid-19 nga aleanca e Pfizer me BioNTech dhe grupi francez Valneva. Britania siguroi 30 milionë doza të vaksinës së Pfizer me BioNTech dhe një marrëveshje në parim për 60 milionë doza të vaksinës së Valneva, me një opsion të 40 milionë doza të tjera nëse vërtetohet se është e siguritë, sipas Ministrisë së Biznesit.
Ndërkohë që nuk është zhvilluar ende një vaksinë funksionale kundër Covid-19, Britania ka porositur 3 vaksina eksperimentale dhe një total prej 230 milionë dozash. “Ky partneriteti i ri me disa nga kompanitë më të mëdha të botës në farmaceutikë, do të sigurojë se Mbretëria e Bashkuar ka shansin më të mirë për të marrë një vaksinë që mbron ata më në rrezik”, tha ministri i biznesit Alok Sharma.
Kjo vjen pas një marrëveshjeje të lajmëruar më parë me AstraZeneca për të prodhuar 100 milionë doza të vaksinës që po zhvillohet në partneritet me Universitetin e Oxfordit. Pfizer dhe BioNTech synojnë të prodhojnë deri në 100 milionë doza deri në fund të këtij vitit dhe mbi 1.2 miliardë deri në fund të vitit 2021, nëse vaksina rezulton e suksesshme. Injeksioni përdor metodën e lajmëtarëve të acidit ribonukleik, ndryshe nga vaksina që po zhvillohet nga Valneva. Britania deklaroi gjithashtu se ka siguruar trajtime që përmbajnë antitrupa neutralizues të Covid-19 nga AstraZeneca, për të mbrojtur njerëzit që nuk mund të vaksinohen.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.