“Britania në rrjetën e BE” – 1 ditë para votimit, Gjykata e Lartë jep mundësi për anulimin e njëanshëm të Brexit!
Gjykata e lartë e Bashkimit Europian vendosi se Mbretëria e Bashkuar mund të anulojë njëanshmërisht Brexit, duke rritur kështu shpresat e pro-europianëve përpara një votimi vendimtar në parlamentin britanik mbi marrëveshjen e divorcit të Kryeministres Theresa May.
Vetëm 36 orë para se të votohet për marrëveshjen e May, Gjykata e Drejtësisë tha në një vendim urgjent se Londra mund të revokojë nenin 50 të njoftimit zyrtar të divorcit pa asnjë gjobë. Nga ana tjetër, qeveria e May tha se vendimi nuk do të thotë asgjë, sepse nuk ka ndërmend të anulojë vendimin për t’u larguar nga BE më 29 mars. Gjithsesi, kritikët e marrëveshjes thonë se ajo ofron mundësi – ose të vonojë Brexit dhe të ri negocioje kushtet e tërheqjes, ose ta anulojë krejtësisht nëse britanikët ndryshojnë mendjen.
“Mbretëria e Bashkuar është e lirë të heqë në mënyrë të njëanshme njoftimin rreth qëllimit që ka për t’u tërhequr nga BE” –tha gjykata. “Një revokim i tillë, i vendosur në përputhje me kërkesat kushtetuese kombëtare, do kishte efekt që Mbretëria e Bashkuar të mbetej në BE nën kushte të pandryshuara.”
E ardhmja e Brexit mbetet thellësisht e pasigurt pasi dhjetëra anëtarë të Parlamentit kanë premtuar publikisht për të votuar marrëveshjen e shkurorëzimit të May, një kompromis që lejoi Mbretërinë e Bashkuar të dilte duke qëndruar brenda orbitës së BE. Rezultati përfundimtar i Brexit do të riformojë ekonominë e Britanisë prej 2.8 trilionë dollarësh, ka pasoja shumë të mëdha për unitetin e Mbretërisë së Bashkuar dhe të përcaktojë nëse Londra mund të mbajë vendin e saj si një nga dy qendrat kryesore financiare globale.
Në referendumin e 23 qershorit 2016, 17.4 milion votues, ose 52 për qind mbështetën Brexit ndërsa 16.1 milion, ose 48 për qind, mbështetën qëndrimin në BE.
Sipas Reuters, fushatat që shpresojnë të ndalojnë Brexitin janë nxitur gjatë javëve të fundit, pasi vetë May, paralajmëroi se nëse marrëveshja e saj nuk arrihet atëherë Mbretëria e Bashkuar mund të ballafaqohet me një Brexit pa marrëveshje ose pa asnjë Brexit. Kur u pyetën për vendimin e Gjykatës Europiane, Michael Gove, aktivisti më i shquar i Brexit në qeverinë britanike, tha se Mbretëria e Bashkuar nuk dëshiron të mbetet anëtare e bllokut .
“Ne nuk duam të qëndrojmë në BE” – tha Gove, i cili shërben si ministër i mjedisit, për BBC radio. “Ne votuam shumë qartë. 17.4 milion njerëz dërguan një mesazh të qartë se ne donim të largohemi nga Bashkimi Europian dhe kjo do të thotë edhe braktisjen e juridiksionit të Gjykatës Europiane të Drejtësisë. Kështu që ky rast është shumë i mirë, por nuk ndryshon as votën e referendumit, as synimin e qeverisë për t’u larguar më 29 mars”.
Gazetat britanike kanë raportuar se May mund të vonojë votimin e 11 dhjetorit për marrëveshjen e saj dhe partia irlandeze e Veriut, e cila e mbështet qeverinë e saj, ka sugjeruar që ajo duhet të hyjë në Bruksel për të arritur më mirë kushtet. BE thotë se marrëveshja është më e mira që mund të ofrojë dhe përmbajtja e saj nuk mund të ndryshohet. Gove tha se votimi do të vazhdojë siç ishte planifikuar. Parashikimet e tanishme tregojnë se marrëveshja e May-it do të mposhtet. Tre nga katër ish kryeministrat britanikë, John Major, Tony Blair dhe Gordon Brown, kanë thënë se një referendum i dytë është rruga për të zgjidhur krizën.
Disa zyrtarë të lartë të BE thanë se Britania duhet t’i lejohet të mbetet në bllok, por mund t’i kërkohet të heqë dorë nga disa nga kushtet e veçanta që ka fituar gjatë katër dekadave të fundit, veçanërisht një zbritje të fuqishme në pagesat e saj ndaj buxhetit të bllokut.
Përshtati: Estina Trungu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.