Britania nis rrugën e gjatë të rimëkëmbjes. Prodhimi rritet lehtë në Maj pas rënies rekord me 20.3% në Prill
Ekonomia britanike sapo ka nisur rrugën e gjatë të rimëkëmbjes nga kriza e Covid-19 në muajin Maj, ndërkohë që aktiviteti filloi të përshpejtohet pas lehtësimit të masave të karantinës. Produkti i Brendshëm Bruto u rrit me 1.8% në Maj, pas një rënieje rekord prej 20.3% në Prill, që ishte dhe muaji i parë i plotë i karantinës në Britani. Në periudhën tremujore deri në Maj, zyra e Statistikave në Londër tregoi se ekonomia u tkurr me 19.1% dhe krahasuar me një vit më parë, ishte 24% më e vogël.
“Rimëkëmbja e prodhimit në Maj reflekton rimëkëmbjen e pjesshme të kërkesës prej heqjes së karantinës dhe jo prova të rifuqizimit ekonomik”, deklaroi Dhoma Britanike e Tregtisë. Rimëkëmbja e dobët u nxit nga një rritje prej 0.9% në sektorin e madh të shërbimeve, ndërkohë që kishte shenja të dobësisë në shërbimet profesionale, pronat tregtare dhe programimin kompjuterik. Mbi 44,000 njerëz në Britani kanë vdekur nga koronavirusi, që është shifra më e lartë në Europë.
Qeveria britanike mbylli të gjithë dyqanet dhe bizneset jo të nevojshme më 23 Mars, pak pasi urdhëroi mbylljen e bareve,restoranteve dhe kinemave. Në Maj kishte një zbutje të limituar të rregullave të karantinës dhe më shumë biznese u përshtatën për të operuar në karantinë. Të dhënat e sektorit privat treguan disa shenja të rimëkëmbjes në Maj dhe Qershor, por Banka e Anglisë ka paralajmëruar për një rritje të madhe të papunësisë më vonë gjatë vitit, ndërkohë që përfundojnë masat e mbështetjes së vendeve të përkohshme të punës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.