Britania regjistron numër rekord infeksionesh Covid – Franca ashpërson masat e udhëtimit nga Mbretëria e Bashkuar!

Mbretëria e Bashkuar regjistroi 78,610 raste ditore të COVID-19 të mërkurën – numri më i lartë që nga fillimi i pandemisë si pasojë e variantit të ri Omicron shumë të transmetueshëm. Sasia e kohës që duhet që numri i rasteve të Omicron të dyfishohet në disa rajone është më pak se dy ditë, tha kryeministri Boris Johnson.

Ai u bëri thirrje njerëzve të marrin dozën e tyre përforcuese, e cila do t’u jepte atyre më shumë mbrojtje kundër virusit. Më shumë se 650,000 injeksione përforcuese u dhanë të martën (14 dhjetor), me më shumë se 45 % të të rriturve në total. Rreth 81 % e popullsisë së Mbretërisë së Bashkuar të moshës 12 vjeç e lart janë plotësisht të vaksinuar kundër virusit. Zyrtari kryesor mjekësor i Anglisë, profesor Chris Whitty tha se ata mund të prisnin që rekordet të vazhdojnë të thyhen ndërsa Omicron përhapet.

Franca do të shtrëngojë kushtet e hyrjes për njerëzit që udhëtojnë nga Mbretëria e Bashkuar në mënyrë që të kufizojë përhapjen e variantit Omicron, tha të enjten një zëdhënës i qeverisë franceze. Masat e reja do të jenë “më drastike” se ato që ekzistojnë për momentin, tha Gabriel Attal.

Testet e COVID-19 që tashmë kërkohen për të hyrë në Francë nga Britania e Madhe do të duhet të jenë kryer brenda 24 orëve të mëparshme, në vend të 48 orëve aktuale. Në atë që duket se përbën një ndalim për çdo gjë tjetër përveç udhëtimeve jo thelbësore, hyrja do të kufizohet për qytetarët francezë, banorët dhe familjet e tyre. Udhëtimi për “turizëm ose biznes për njerëzit që nuk janë rezidentë në Francë do të jetë i kufizuar, shtoi Attal.

Njerëzit që mbërrijnë në Francë nga Britania e Madhe do të duhet gjithashtu të izolohen për shtatë ditë, në një vend që udhëtarët mund të zgjedhin, “me një kontroll nga forcat e sigurisë”. Megjithatë, karantina mund të “hiqet pas 48 orësh” nëse testi i kryer pas mbërritjes në Francë rezulton negativ.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.