Britania, rregulla të reja për azilkërkuesit / Do ta bëjë të vështirë për ata që hyjnë në mënyrë të jashtëligjshme
Britania do të prezantojë rregulla të reja për ata që kërkojnë azil, duke e bërë më të vështirë për refugjatët që të hyjnë në mënyrë të jashtëligjshme për të qëndruar në vend, çka përbën ndryshimin më të madh të sistemit të azilit në dekada, sipas Qeverisë.
“Plani i Ri për Emigrimin” do të strehojë refugjatët në rrezik urgjent më shpejtë, ndërkohë që do ta bëjë më të vështirë për ata që vijnë në mënyrë të jashtëligjshme. Ministrja e Brendshëm Priti Patel, tha se mbi 60% e rasteve përfshijnë këta të fundit. Ajo tha se ata që bëjnë udhëtime të rrezikshme nga vende të sigurta në Evropë, si Franca, Italia, Gjermania dhe Belgjika, duhet të kërkojnë azil në këto vende dhe jo të vijnë në Mbretërinë e Bashkuar. Që kur Britania doli nga Bashkimi Evropian në fund të 2020-s, Kryeministri Boris Johnson është përpjekur të krijojë një vizion të pavarur për vendin, duke prezantuar politika të reja në mbrojtje dhe emigrim. Reduktimi i emigrantëve ka qenë një ndër premtimet e bëra gjatë fushatës për të dalë nga Bashkimi Evropian, në referendumin e vitit 2016.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.