Britanikët “bëhen” irlandezë – Numri rekord i pasaportave irlandeze të lëshuara gjatë vitit 2017
Numri i pasaportave irlandeze të lëshuara në vitin 2017 ka shënuar nivel rekord që nga votimi i Brexit, me kërkesë të qytetarëve britanikë që jetojnë në Britani dhe Irlandën e Veriut, njoftoi qeveria irlandeze.
Më shumë se 160,000 pasaporta irlandeze u janë lëshuar njerëzve në Irlandën e Veriut dhe Britani gjatë vitit 2017. Në të njëjtën kohë, numri i njerëzve të lindur në Britani, që regjistrohen si irlandezë është rritur me 95%.
Sipas statistikave të lëshuara të premten nga departamenti i punëve të jashtme të Irlandës, 779,000 pasaporta irlandeze janë lëshuar në vitin 2017, numri më i madh që nga fillimi i regjistrimeve.
“Ky është numri më i madh i pasaportave irlandeze të lëshuara ndonjëherë në një vit. Duke shënuar një rritje prej mbi 6% krahasuar me vitin 2016 dhe një rritje prej mbi 15% që nga viti 2015 “, tha Simon Coveney, ministër i punëve të jashtme.
Në Irlandën e Veriut, ndër të tjera ata që u identifikuan si britanikë, që bërën kërkesën për një pasaportë të dytë irlandeze, ishin deputeti i unionit të djathtë për Veriun Ian Paisley Jr dhe ish-ambasadori britanik në Irlandë, Sir Ivor Roberts.
Kushdo që ka një prind irlandez ose gjyshin e lindur në Irlandë, ka të drejtën e një pasaporte. Përveç kësaj, Britania lejon shtetësinë e dyfishtë, ndryshe nga vendet e tjera europiane. Kjo mund të shpjegojë pse ka pasur pothuajse dyfishim të numrave që regjistrohen si një person irlandez i lindur jashtë vendit në Britani në vitin 2017.
Gjithashtu kërkesa e lartë për të patur një pasaportë irlandeze është e lidhur ngushtë me votimin për daljen e Britanisë së Madhe nga BE, pasi kjo pasaportë u jep mundësinë qytetarëve britanikë të ruajnë shtetësinë europiane.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.