Britanikët në vështirësi – Të shqetësuar për ekonominë dhe financat e tyre

Brexit ka shtyrë besimin konsumator në Britaninë e Madhe pranë nivelit më të ulët në 6 vite, tregojnë të dhënat më të fundit.

Këtë gjë e thotë shoqata e ndërtimit në vend, e cila evidenton faktin se, konsumatorët britanikë janë të shqetësuar për financat dhe ekonominë e tyre dhe se rritja e çmimit të shtëpive në vend ka qenë inekzistente gjatë  gushtit, si pasojë e këtyre shqetësimeve që lidhen ngushtësisht me Brexit.

Në terma mujorë, çmimet e shtëpive nuk kanë ndryshuar, ndërkohë që krahasuar me vitin paraardhës, regjistrohen në rritje, me vetëm 0.6%. Ky është muaji i 9-të me radhë në rritje nën 1%. Familjet në Britani janë tepër të shqetësuara për ekonominë e gjerë.

Parashikimet e tyre janë pranë nivelit më të ulët që prej vitit 2011. Por, ky pesimizëm mund të jetë edhe rrjedhojë e impaktit të dobësimit të Sterlinës në fuqinë e tyre blerëse.

Të dhënat më të fundit tregojnë se parashikimet e inflacionit flasin për nivelin më të lartë në 6 vite. Nga ana tjetër, kostot e ulta të huamarrjes si dhe tregu i fortë i punës pritet të mbështesin kërkesën për tregun imobiliar.

Britania e Madhe ndërkohë ka regjistruar tremujorin e parë në kontraktim që prej vitit 2012, ndërkohë që lëvizja e fundit e Boris Johnson për të pezulluar Parlamentin ka rrëzuar edhe më tej Sterlinën si dhe ka rritur frikën për një brexit pa marrëveshje.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.