Britanikët nuk po shpenzojnë – Konsumi privat bie për të tretin muaj me radhë

Për ekonominë britanike po merr formë gjithmonë e më shumë tabloja më e keqe. Për të tretin muaj me radhë, shpenzimet konsumatore regjistrohen në rënie, duke shënuar kështu performancën më të dobët në 4 vite dhe duke e nisur tremujorin e tretë me këmbën e gabuar.

Gjatë Korrikut, shpenzimet konsumatore janë në rënie me 0.8% në krahasim me Korrikun e vitit të kaluar. Veshjet, mallrat për shtëpinë, ushqimet dhe transporti, kanë pësuar rënien më të madhe, thotë një raport i fundit i Markit i publikuar këtë të Hënë.

Rënia e konsumit privat merr shtysë nga pakësimi i të ardhurave të familjeve, si pasojë e inflacionit të lartë dhe rritjes anemike të pagave.

Inflacioni prej disa muajsh është më i lartë se rritja e pagave, duke gjeneruar për rrjedhojë një pakësim të të ardhurave, gjë që reflektohet drejtpërdrejtë te konsumi.

Por, te konsumatorët po ndikon edhe shqetësimi për të ardhmen e vendit. Raporti dhe të dhënat vijnë vetëm pak ditë pasi Banka e Anglisë uli projeksionet për ekonominë e vendit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.