Brukseli vjen në Tiranë – Juncker, Mogherini, Hahn do të prezantojnë 6 iniciativat

Të Dielën pasdite, presidenti i Komisionit Europian, Jean Claude Juncker, i shoqëruar nga Komisioneri për Zgjerim, Johannes Hahn dhe përfaqësuesja e lartë e Bashkimit Europian për Politikën e Jashtme dhe Sigurinë, Federica Mogherini, do të vizitojë zyrtarisht Tiranën.

Vizita e numrit një të Komisionit Europian do të fillojë ditën e dielë paradite në Maqedoni. Më pas do të vijojë me Shqipërinë, ku takimet do të zhvillohen si të Dielën pasdite ashtu edhe të Hënën paradite.

Axhenda zyrtare parashikon takimin dhe konferencën për shtyp me kryeministrin Rama të Dielën në orën 19.15, ndërkohë që takimi me Presidentin Meta parashikohet ditën e Hënë në 11.30.

Më pas delegacioni do të vizitojë Serbinë, Malin e Zi, Bosnjen, Kosovën dhe në fund, në datën 1 Mars, Bullgarinë.

Vizita e Juncker vjen për t`i dhënë më shumë jehonë zërave të kohëve të fundit që flasin për një angazhim maksimal të Brukselit në çështjen e integrimit të Ballkanit Perëndimor.

Kjo gjë vihet re edhe nga interesi i madh  i mediave europiane. E fundit që ka shkruar për këtë është britanikja “Express”.

Sipas saj, vizita e treshes europiane në Ballkan konfirmon vullnetin për integrimin e rajonit. Sipas “Express”, vizita do të shërbejë për të prezantuar edhe 6 iniciativat e famshme për rajonin, të shpalosura fillimisht me strategjinë  e zgjerimit të unionit.

Ndër të tjera, “Express” shkruan edhe se, Komisioni Europian ka ndërmend që të rrisë ndjeshëm fondet “Ipa” për rajonin.

Shkrimi i prestigjiozes britanike mban titullin: Shqipëria dhe Maqedonia do të fillojnë negociatat për anëtarësim këtë verë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.