Brukseli zhvlerëson ekonominë shqiptare – “Punësimi i ngadaltë bën që rritja ekonomike të jetë më e dobët”

Ngadalësimi i tregut të punës, por edhe impakti i ngadalësimit të ekonomive europiane, parterëve tanë, ka bërë që Komisioni Europian të shkurtojë projeksionet për ekonominë shqiptare, këtë vit dhe atë të ardhshëm.

Përfundimet bien në sy në raportin më të fundit për ekonominë europiane të periudhës së pranverës, ku përfshihen edhe vendet kandidate. “Rritja ekonomike projektohet të jetë e fortë përgjatë 2019-ës, në 3.8%, nxitur nga konsumi privat si dhe forcimi i investimeve, si dhe të dobësohet disi  në 3.7% në 2020, si pasojë e ngadalësimit të punësimit dhe rritjes më të dobët të partnerëve kryesorë ekonomik europian, gjë që peshon te remitancat dhe te eksporti i lëndëve të para”, thotë Komisioni Europian në kapitullin dedikuar Shqipërisë.  Kështu, institucioni është i pari institucion madhor që i`a “vesh” punësimit barrën e ngadalësimit të ekonomisë gjatë viteve të ardhshme.

Sipas krahut ekzekutiv të Bashkimit Europian, ngadalësimi i punësimit, në më pak se 2% do të çojë edhe në një ngadalësim të ritmit të rritjes së shpenzimeve familjare, duke dëmtuar për rrjedhojë edhe rritjen ekonomike. Kjo e fundit, për vitin aktual projektohet në 3.8%, ndërkohë që në raportin e kaluar, atë të vjeshtës, projektohej në 3.9%. Për vitin e ardhshëm projeksionet aktuale flasin për një normë në 3.7%, ndërkohë që ato të vjeshtës sinjalizonin 3.9%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.