BSH analizon vitin 2020 – “Treguesit kryesorë të shëndetit bankar mbeten pozitivë”

Banka e Shqipërisë ka publikuar raportin më të fundit të mbikëqyrjes financiare për vitin 2020, atë të pandemisë, ku analizon të gjithë sektorin financiar, bankar dhe jo bankar. “Treguesi më i rëndësishëm i mbikëqyrjes, ai i mjaftueshmërisë së kapitalit, në fund të vitit 2020, raportohet në nivelin 18.32%. Në krahasim me të njëjtën periudhë të vitit të kaluar, ky tregues shfaqet me një rënie prej 0.34 pikë përqindjeje”-nënvizon Banka e Shqipërisë në raport.

“Po kështu, edhe treguesi i kredive me probleme ka pësuar një rënie prej 0.26 p.p në terma vjetorë, duke arritur në 8.11% në fund të vitit 2020. Në fund të vitit 2020, kredia me probleme arriti nivelin 49.4 miliardë lekë. Ndërkohë, portofoli i kredive rezulton në rritje me 13.74 miliardë lekë ose 2.39%, gjatë këtij viti. Treguesit e përfitueshmërisë,  përkatësisht kthimi nga aktivet mesatare (RoAA) dhe kthimi nga kapitali aksioner mesatar (RoAE) – shfaqen në rënie krahasuar me vitin 2019. Vlerat, në fund të vitit 2020, shfaqen në 1.10% për RoAA dhe 10.65% për RoAE, ndërsa në fund të vitit 2019 këta tregues ishin përkatësisht 1.39% dhe 13.45%”-shton më tej institucioni.

“Situata e përgjithshme e likuiditetit të sistemit bankar, gjatë vitit 2020, ka vijuar të provojë qëndrueshmëri, duke paraqitur një ekspozim relativisht të ulët ndaj rrezikut të likuiditetit. Rritja e qëndrueshme e nivelit të depozitave, si kontribuues kryesor i financimit të aktivitetit të bankave, niveli dy herë më i lartë i treguesit të likuiditetit kundrejt minimumit rregullator (i llogaritur si raport i aktiveve likuide ndaj pasiveve afatshkurtra), niveli i ulët i treguesit kredi ndaj depozitave, si dhe aftësia e sistemit për të gjeneruar likuiditet në rastet e materializimit të situatave të jashtëzakonshme, përbëjnë një kuadër të kënaqshëm për mbrojtjen ndaj rrezikut të likuiditetit”-citon raporti i Bankës së Shqipërisë sa i përket treguesve kryesorë të shëndetit financiar bankar.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.