BSH, “kampione” në komunikimin me publikun – Banka Qendrore e Austrisë: Rreth 250 fjalime në vit, e para në rajon, më mirë edhe se shumë vende të BE
Banka Qendrore e Austrisë ka publikuar raportin e tremujorit të dytë për integrimin ekonomik europian të vendeve të Europës, qendrore, lindore dhe juglindore, pjesë e të cilave është edhe Shqipëria. Ashtu si çdo tremujor paraardhës, raporti zhvendos fokusin drejt temave të ndryshme të rëndësishme në kuadër të integrimit ekonomik të këtyre vendeve. Risia e raportit të fundit është fokusi që vendoset ndaj komunikimit me publikun të bankave qendrore, dhe Shqipëria këtu mban një rekord të padiskutueshëm, gjë që nënvizohet mes reshtave të raportit, por edhe nëpërmjet ilustrimeve grafike. Banka Qendrore e Shqipërisë mban kështu rekordin sa i përket fjalimeve, me thujase 250 të tilla në vit.
Asnjë vend tjetër i rajonit të gjerë nuk i afrohet kësaj shifre. Madje, vendi i dytë pas Shqipërisë, është Turqia, me diçka më pak se 100 fjalime. Banka Qendrore e Austrisë sqaron mes reshtave se ky tregues nuk varet aspak nga madhësia e ekonomisë së një vendi apo regjimi i politikës monetare, por kryesisht nga këndvështrimi i bankave qendrore në lidhje me kushtet e caktuara ekonomike.
Raporti jep një krahasim ne këtë tregues edhe me vendet e Bashkimit Europian apo vendet e Eurozonës, Shqipëria duket në pozita thuajse të njëjta me Italinë, dhe më mirë se vende si, Greqia, Finalnda, Holanda, Belgjika apo edhe vetë Austria. Bankat qendrore të Britanisë së Madhe apo Gjermanisë janë kampionet europiane në këtë drejtim. “Banka Qendrore e Shqipërisë ka një komunikim të shpeshtë me publikun, ndërkohë që institucionet homologe të saj në rajonin e gjerë janë mbrapa në këtë drejtim”-nënvizon Banka Qendrore e Austrisë.
Raporti i Bankës Qendrore të Austrisë shkon edhe më tej në këtë pikë, duke analizuar edhe përmbajtjen e këtyre fjalimeve sipas shteteve. Sa i përket Shqipërisë, tema numër tre, e cila i referohet stabilitetit financiar është ajo që merr vëmendjen maksimale në daljet e Bankës së Shqipërisë. Ndërkohë, tema që merr vëmendjen më të ulët nga Banka e Shqipërisë duket të jetë pikërisht ajo e integrimit europian.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.