BSH konfirmon krizën e konsumatorit – Treguesi i besimit bie pranë niveleve të fillimit të pandemisë, tkurrjen blerjet!

Banka e Shqipërisë, nëpërmjet vrojtimit të besimit të biznesit dhe konsumatorit, tregon se treguesi i ndjesisë ekonomike (TNE) ka rënë me 2 pikë gjatë muajit mars të këtij viti, duke zbritur pranë 103 pikëve, nga 105 pikë që ishte gjatë muajit shkurt. Marsi është muaji i tretë me radhë në rënie për këtë tregues.  Sipas institucionit, kjo rënie udhëhiqet kryesisht nga konsumatori dhe nga tregtia. Treguesit në rritje ndërkohë janë ata të industrisë, shërbimeve dhe ndërtimit, duke ndikuar në një rënie më të moderuar të indikatorit të përgjithshëm.

Indikatori me rënien më të madhe duket të jetë pikërisht ai i besimit të konsumatorit, në tkurrje me 6.7 pikë gjatë muajit mars, për të 4-tin muaj me radhë në rënie. Sipas Bankës së Shqipërisë, ky tregues ka prekur nivelin e dytë më të ulët historik, pas rekordit të regjistruar në fillim të pandemisë. Rënia e treguesit ka ardhur kryesisht si pasojë e blerjeve aktuale, ndërkohë që pritshmëritë për të ardhmen nuk kanë pësuar ndonjë përkeqësim. Ndikim në renien e besimit konsumator gjatë marsit kanë pasur edhe pritshmëritë për situatën ekonomike dhe atë financiare.

Nga ana tjetër, konsumatori shqiptar pret një rritje të mëtejshme të çmimeve në të ardhmen. Kujtojmë se konsumatori familjar përfaqëson rreth 80% të ekonomisë së vendit, një ndër normat më të larta në Europë, dhe kriza e çmimeve pritet të përkthehet edhe në një krizë konsumi, gjë që vihet re edhe nga treguesit më të fundit të Bankës së Shqipërisë. Sa i përket konsumatorit, thuajse të gjithë treguesit që masin perceptimin mbi ekonominë dhe situatën e tyre kanë regjistruar rënie gjatë muajit mars, tregon vrojtimi i Bankës së Shqipërisë.

Nga ana tjetër, në rënie regjistrohet edhe treguesi i besimit në tregti, me -1.5 pikë, duke përforcuar tendencën negative të nisur në muajin shkurt. Treguesi i besimit në shërbime ndërkohë u rrit me 0.7 pikë gjatë marsit, ai i ndërtimit u rrit me 0.5 pikë, ndërsa ai i industrisë me 2.2 pikë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.