BSH “reanimon” euron – Fiton gati një pikë të enjten, rritet në 125.5 lekë
Ashtu siç pritej, ndërhyrja e Bankës së Shqipërisë në tregun valutor ka sjellë një zhvlerësim të ndjeshëm të lekut kundrejt euros qysh ditën e enjte. Sipas kursit zyrtar të këmbimit, monedha europiane u këmbye me 125.25 lekë, në rritje me 0.83 pikë krahasuar me të mërkurën.
Këshilli Mbikëqyrës i Bankës Qendrore vendosi dje njëkohësisht uljen e normës bazë të interesit dhe nisjen e operacioneve të blerjes së valutës.
Në një takim me mediat, pa praninë e kamerave, drejtuesit e departamentit të Politikës Monetare dhe Operacioneve Monetare në Bankën e Shqipërisë, thanë se ky operacion do të ketë natyrë të përkohshme, me qëllim frenimin e forcimit të mëtejshëm të lekut. Ekspertët nënvizuan sërish se ky operacion është vetëm në funksion të objektivit të inflacionit dhe se Banka Qendrore nuk ka si objektiv në vetvete të ndërhyjë në kursin e lirë të këmbimit valutor.
Drejtuesit e Bankës së Shqipërisë refuzuan të jepnin hollësi lidhur me sasinë e valutës që do të blihet dhe me kohëzgjatjen e këtyre operacioneve. Ata nuk përcaktuan as ndonjë objektiv konkret që synohet të arrihet në kursin e këmbimit euro-lek, por u shprehën se forcimi i mëtejshëm i lekut ndaj euros nuk do të ishte i shëndetshëm për ekonominë.
Zhvlerësimi i euros i tejkaloi parashikimet e Bankës së Shqipërisë, kur zbriti në fillim të kësaj jave deri në kufirin e 124 lekëve. Banka gjykon se një forcim i tillë i lekut nuk reflekton faktorët thelbësorë që e përcaktojnë nivelin e kursit të këmbimit, por është kryesisht rezultat i pritshmërive të krijuara tek aktorët e tregut nga tendenca e muajve të fundit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.