BSH ul normën bazë në 1%, Sejko: Do të blejmë euro për të zhvlerësuar lekun

Me një vendim të papritur, Këshilli Mbikëqyrës i Bankës së Shqipërisë vendosi të mërkurën uljen e normës bazë të interesit në 1%, duke vendosur një rekord të ri historik për monedhën shqiptare.

Guvernatori Sejko e argumentoi vendimin e sotëm me forcimin e shpejtë të lekut ndaj euros, që po e vështirëson akoma më shumë përpjekjen e Bankës së Shqipërisë për kthimin e inflacionit drejt objektivit prej 3%.

Vetë ulja e normës bazë të interesit, në teori, është një masë që mund ta ndikojë direkt kursin e këmbimit. Ulja e normës bazë të interesit rrit ofertën monetare në lekë dhe mund të sjellë zhvlerësim të monedhës vendase.

Sejko njoftoi gjithashtu edhe ndërhyrje në tregun valutor për blerjen e euros, çka pritet të sjellë forcim të monedhës europiane ndaj lekut.

Ai nuk dha detaje rreth përmasave që do të kenë këto operacione, por duhet thënë se që nga viti i kaluar Banka e Shqipërisë po blen euro në sasi të konsiderueshme me qëllim rritjen e rezervës valutore. Deri tani, këto blerje nuk kanë arritur ta frenojnë dobësimin e euros.

Ndërhyrja e radhës mund të jetë në përmasa më të mëdha, me qëllim dhënien e një ndikimi të shpejtë në kursin e këmbimit. Megjithatë, përveç efektit të ndërhyrjes direkte, ndoshta më i rëndësishëm mund të jetë ndikimi psikologjik i kësaj lëvizjeje te aktorët e tregut.

Pas shumë ditësh në rënie, euro u forcua lehtë dhe u këmbye të mërkurën në vlerën e 124.42 lekëve. Ky mund të jetë një efekt i parë i ndërhyrjes së bankës së Shqipërisë në treg.

Javët e fundit, ka pasur një trysni në rritje nga bizneset eksportuese, por edhe nga opozita, për marrjen e masave që do të frenonin zhvlerësimin e euros.

Ndoshta edhe për të lënë të kuptohet se Banka e Shqipërisë nuk është ndikuar nga presione të jashtme, Sejko kujtoi sërish se institucioni i tij mbështet regjimin e kursit të lirë valutor dhe se kjo është një ndërhyrje e jashtëzakonshme, vetëm në funksion të objektivit të inflacionit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.