BSH vlerëson buxhetin – Sejko: Ka stimuj fiskalë që ndikojnë në investime
Buxheti i vitit të ardhshëm dhe paketa fiskale që e shoqëron atë përcaktojnë stimuj fiskalë që ndikojnë vendimet e sektorit privat për konsum dhe investime. Ky është opinion i Bankës së Shqipërisë, i bërë publik nga Guvernatori Gent Sejko, në komisionin Parlamentar të Ekonomisë. Sipas Sejkos, këto aspekte ndikojnë kërkesën e brendshme, rritjen ekonomike, zgjerimin e punësimit dhe përmirësimin e mirëqenies.
“Banka e Shqipërisë konstaton se, nëpërmjet shënjestrimit të një balance primare pozitive dhe synimit për reduktimin e mëtejshëm të borxhit publik, Projektbuxheti i vitit 2018 vazhdon rrugën e konsolidimit fiskal. Banka e Shqipërisë vlerëson se ky Projektbuxhet ruan të pandryshuar kombinimin e politikave ekonomike që kanë mbështetur zhvillimin e vendit, çka ndihmon në forcimin e mëtejshëm të ekuilibrave makroekonomikë, rrit besimin e investitorëve në ekonominë shqiptare, si dhe dërgon sinjalet e duhura në tregjet financiare dhe në agjencitë e renditjes së borxhit publik”, tha Sejko.
Ndërsa i pyetur kryesisht nga deputetet e opozitës se sa është në dijeni BSH për projektin “1 miliard” të qeverisë, Sejko iu përgjigj se sistemi bankar është i monitorueshëm dhe se ka rregullore të përcaktuara në financime.
Sipas Sejkos, kompozimi i shpenzimeve publike paraqitet më mbështetës për zhvillimin e vendit. Shpenzimet kapitale parashikohet të rriten me ritme më të shpejta se shpenzimet korrente ndërsa efekti total i tyre në rritjen ekonomike është relativisht më i madh dhe më i qëndrueshëm në kohë. Sugjerimet e Guvernatorit për qeverinë për buxhetin e vitit të ardhshëm u fokusuan në 5 pika kryesore:
1-Mbi deficitet e skemave të sigurimeve shoqërore e shëndetësore
2-Mbi programet e Partneritetit Publik – Privat
3-Mbi strukturën e financimit të borxhit
4- Mbi respektimin e nivelit të parashikuar të deficitit buxhetor gjatë vitit 2018
5-Mbi efektivitetin e financave publike
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.