Buffet blen “qiejt”, $9.3 mld aksione në katër kompani ajrore në SHBA
Orakulli i Omahas, Warren Buffet ka investuar plot 9.3 miliardë dollarë në linjat ajrore amerikane. Pak kohë më parë ai deklaronte se linjat ajrore janë një kurth vdekjeprurës për investitorët, por tashmë duket se ka ndryshuar mendim. Kjo shifër e çmendur parash është investuar në mënyrë sistematike duke filluar prej nëntorit të vitit të kaluar.
Vetëm një ditë më parë, u raportua se Warren Buffet kishte tërhequr të gjitha kuotat e tij nga Walmart, rrjeti gjigand i supermarketeve. warren Buffet njihet për portofolin e tij të investimeve të diversifikuar, dhe çdo lëvizje e tij në tregje merr vëmendjen publike.
Që prej fitores së Donald Trump, ai ka blerë aksione në vlerën e 2.1 miliardë dollarëve për secilën nga katër kompanitë më të mëdha ajrore në Shtetet e Bashkuara, American Airlines, Delta Airlines, Southwest Airlines dhe United Continental.
Mjaftoi ky lajm, që aksionet e të katër këtyre kompanive të rriteshin me të paktën 2% në sesionin tregtar të së Mërkurës. Indeksi i sektorit regjistron një rritje në 40% gjatë 12 muajve të fundit, dhe duket se pikërisht kjo ka nxitur miliarderin të investojë. Buffet ka filluar të investojë masivisht, jo vetëm në kompanitë ajrore. Prej fitores së Donald Trump ai ka katërfishuar aksionet e tij te Apple, duke u bërë kështu një ndër 10 aksionerët kryesorë të Apple.
Roel Korkuti/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.