Bullgaria do të lejojë hyrjen e qytetarëve nga vendet e BE-së dhe Shengenit – Hiqet karantina për disa kategori qytetarësh
Bullgaria, e cila ka filluar të lehtësojë bllokimin e saj, ka hequr ndalimin e hyrjes së vizitorëve nga vendet e Bashkimit Europian dhe zonës Shengen, tha ministria e shëndetësisë në një deklaratë.
Në mes të marsit, anëtarja e Bashkimit Europian, ndaloi hyrjen në territorin e saj për udhëtarët nga shumë vende në përpjekje për të parandaluar përhapjen e koronavirusit.
Ministria e shëndetësisë tha se heqja e ndalimit përfshin gjithashtu San Marinon, Andorran, Monakon dhe Qytetin e Vatikanit.
Ministria tha që njerëzit që vijnë në Bullgari do të vazhdojnë të kalojnë 14 ditë në karantinë. Por periudha 14-ditore nuk do të zbatohet më për qytetarët bullgarë dhe qytetarët e vendeve të tjera të BE-së që udhëtojnë për arsye humanitare dhe ata që janë “përfaqësues të veprimtarive tregtare, ekonomike dhe investuese”.
Karantina gjithashtu nuk do të zbatohet për njerëzit që lidhen drejtpërdrejt me ndërtimin, mirëmbajtjen, funksionimin dhe sigurimin e infrastrukturës strategjike dhe kritike të Bullgarisë, tha ministria.
Më parë, Bullgaria tha se kishte rënë dakord me Greqinë dhe Serbinë fqinje për të lehtësuar disa kufizime të udhëtimit të vendosura për të frenuar përhapjen e koronavirusit nga 1 qershori.
Shteti i varur nga turizmi i Detit të Zi filloi të lehtësojë bllokimin e tij pasi numri i infeksioneve të reja është zvogëluar. Që nga e enjtja, Bullgaria kishte 2.331 raste të konfirmuara të koronavirusit dhe 120 vdekje, një numër relativisht i ulët në Europë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.