Bullgaria ‘me një këmbë në Shengen’ – Weber: Do të hyjë pjesërisht në vitin 2019
Manfred Weber, kandidati presidencial i Partisë Popullore Europiane për Komisionin Europian, ka pohuar se Bullgaria do të hyjë pjesërisht në zonën Shengen në vitin 2019. Kjo do të thotë se pasagjerët në fluturimet midis Bullgarisë dhe Zonës Shengen nuk do të jenë subjekt i kontrolleve të pasaportave.
Megjithatë, Bullgaria nuk do të hyjë plotësisht në këtë zonë, pasi kontrollet do të vazhdojnë të kryhen në pikat e kalimit kufitar tokësor, kryesisht për shkak të migrimit të paligjshëm.
Ky lajm me sa duket ka shqetësuar Rumaninë, raporton ‘Emerging Europe’, pasi siç duket vendi është lënë jashtë planit, ku Weber ka qenë një nga kritikët më të mëdhenj të qeverisë rumune dhe ndryshimet që ka bërë ndaj ligjeve të drejtësisë gjatë vitit të kaluar.
“Kjo është një qeveri që gabimisht përdor shumicën e saj për të mbrojtur udhëheqësin e dënuar të Partisë Social Demokrate në pushtet’, deklaroi Weber.
Deri më tani ishte menduar në Rumani dhe Bullgari, si dhe në Bruksel që të dy vendet të hynin në zonën Shengen në të njëjtën kohë.
Megjithatë, Komisioni Europian ndërsa ‘lavdëroi’ përparimin e Bullgarisë në raportin më të fundit për Bashkëpunimin dhe Mekanizmin e Verifikimit, nuk ka konfirmuar ende propozimin e Weber dhe burime të ndryshme kanë dhënë afate të ndryshme për anëtarësimin e vendit në Shengen.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.