Bundesbank vlerëson ekonominë – “Gjermania do qëndrojë e dobët në fillim të vitit prej koronavirusit”
Banka qendrore e Gjermanisë deklaroi se ekonomia më e madhe e Europës do të qëndrojë e dobët në tremujorin e parë 2020, prej dobësimit të eksporteve dhe rrezikut të koronavirusit kinez.
Ekonomia gjermane rezultoi në stanjacion në tremujorin e katërt 2019 dhe u rrit me vetëm 0.6% për të gjithë vitin e kaluar, ndërkohë që sektori i manifakturës u zhyt në recesion, duke përhapur efekte anësore në pjesën më të madhe të zonës euro.
“Për tremujorin e parë 2020, nuk ka shenja të një ndryshimi rrënjësor apo rimëkëmbjeje për ekonominë gjermane. Me shfaqjen e koronavirusit të ri në Kinë në nisje të vitit 2020, një rrezik i ri është shtuar tek perspektiva”, deklaroi Bundesbank.
Banka Qendrore shtoi se virusi mund të ndërpresë zinxhirin botëror të vlerave dhe mund të shkaktojë ngërçe tek kompanitë gjermane.
Ekonomia më e madhe e Europës do vazhdojë të marrë nxitje nga konsumi i brendshëm, falë rritjes së pagave, tregut të fortë të punës dhe sektorit të ndërtimit. Megjithatë, industria do të vazhdojë në ngadalësim, pavarësisht se treguesit e ndjesisë ekonomike në fund të vitit u përmirësuan.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.