Bursa e energjisë nis operimet në nëntor – Konsorciumi fitues udhëhiqet nga Bursa e Athinës. Bizneset kritikuan liberalizimin pa ngritjen e saj!
Bursa e energjisë do të nisë tregtimin e energjisë elektrike për tregun e ditës në avancë për tregun në muajin Nëntor për Shqipërinë dhe në muajin janar 2023 do shwnohet tregtimi për tregun e Kosovës dhe bashkimin e të dy tregjeve Shqipëri-Kosovë”. Gjithçka bëhet me dije në raportin vjetor të Entit Rregullator të Energjisë, që gjithashtu parashikon që në dhjetor të vitit 2023 të nisë tregtimi i energjisë elektrike brenda të njëjtës dite për tregun e Shqipërisë dhe dy muaj më pas të bëhet bashkimi i tregjeve brenda të njëjtës ditë për të dy tregjet.
Po ashtu, për herë të parë në këtë raport bëhet publik edhe fakti se në fund të vitit 2021 u arrit përzgjedhja e ofruesit të këtij shërbimi, me fitues bashkimin e operatorëve të udhëhequr nga Bursa e Athinës “Hellenic Exchanges – Athens Stock Exchang e S.A.”, Grupi i bursës së energjisë elektrike të Greqisë me dy kompanitë e saj “Hellenic Energy Exchange S.A.” dhe “Enex Clearing House S.A. Ngritja e bursës së energjisë nënkupton listimin e prodhuesve të energjisë elektrike, çka do të rrisë konkurrencën si dhe do të lehtësojë blerjen e energjisë nga të gjithë bizneset e liberalizur që sigurojnë vetë sasinë e nevojshme të energjisë.
Ngritja e saj ka tejkauar çdo afat ligjor, ndërkohë që tashmë ngritja e këtij instrumenti ka një rëndësi edhe më të veçantë, pasi data 1 janar shënoi daljen n treg të lirë të rreth 7500 bizneseve të lidhur në tensionin 20 KV. Prej kohësh, përfaqëuses të këtyre bizneseve kërkojnë informacion mbi afatet se kur do të nisë operimi i bursës, ndërsa liberalizimin e tyre në një kohë kur mungojnë kushtet që duhet të plotësojë tregu në këtë drejtim, sikurse është edhe mungesa e bursës, e kanë konsideruar si të papranueshme.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.