Bursa studimi jashtë vendit, kriteret për kandidatët që duan të aplikojnë. Dokumentet që duhen dorëzuar dhe afati i fundit për aplikim
Ministria e Arsimit dhe Sportit publikon njoftimin për ofrimin e bursave të studimit jashtë vendit. Bëhet fjalë për bursat e studimit për shkollën verore në Turqi për Gjuhën dhe Kulturën turke, të cilat mund të ndiqen nga studentët shqiptarë në Fakultetin e Gjuhëve të Huaja, konkretisht në programin e studimit turqisht.
“Në kuadër të bashkëpunimit dypalësh me Turqinë në fushën e arsimit, Qeveria e Republikës së Turqisë ofron bursa për pjesëmarrje në kursin veror të gjuhës, letërsisë dhe kulturës turke, i cili do të mbahet në qytetin e Konias, Turqi, në datat 24 korrik-14 gusht. Në këtë kurs do të pranohen studentë të niveleve bachelor, master dhe doktoraturë të moshës 18-27 vjeç. Kandidatët duhet të kenë njohuri të mira të gjuhës turke, që përfshijnë minimumin nivelin fillestar. Për bursat e kursit të verës duhet të aplikojnë kryesisht studentët e gjuhës turke pranë Fakultetit të Gjuhëve të Huaja të Universitetit të Tiranës”.
Dokumentet
Kandidatët e interesuar për këtë kurs vere duhet të dorëzojnë në Drejtorinë e Integrimit dhe Projekteve në Ministrinë e Arsimit dhe Sportit këto dokumente:
-Kërkesën për ndjekjen e kursit të gjuhës turke;
-Formularin e aplikimit (bashkëlidhur);
-Një kopje të kontratës, sipas së cilës kandidatët e huaj duhet të bien dakord per kushtet e vendosura nga pala turke për pjesëmarrjen në kursin e verës (bashkëlidhur);
-Letrën mbështetëse nga Departamenti i Gjuhëve Sllave e Ballkanike të Fakultetit të Gjuhëve të Huaja të Universitetit të Tiranës për studentët e gjuhës turke;
-Kopjen e noterizuar të diplomës që vërteton mbarimin e programit të nivelit të parë të studimeve universitare (Bachelor) ose të nivelit dytë të studimeve (Master Profesional/Master i Shkencave);
-Listën e notave;
-Dëshminë për njohjen e gjuhës turke;
-Raportin mjekësor për aftësi studimi;
-Kopjen e faqes së pasaportës me të dhënat e identitetit;
-3 fotografi
“Pala turke mbulon shpenzimet për akomodonin, ushqimin, si dhe programin arsimor dhe kulturor, ndërsa shpenzimet e udhëtimit vajtje-ardhje do të mbulohen nga vetë pjesëmarrësit në kurs, ndërkohë që afati i fundit për aplikim është data 5 qershor 2017”, thuhet në noftimin e MAS.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.