Bursat europiane e nisin javën në rritje – Fokusi, te samiti i G7-ës. Diskutohet Ukraina dhe ekonomia globale

Tregjet europiane janë hapur në rritje në sesionin e parë të kësaj jave, duke vijuar trendin pozitiv të javës së kaluar. Indeksi pan-Europian STOXX 600 po qëndon në rritje të lehtë me 0.4%, ndërsa të premten e javës së kaluar u rrit me 2.6%, duke realizuar fitimet më të mëdha ditore në 3 muajt e fundit.

Por, pavarësisht tendencës në rritje, investitorët po tregohen të kujdesshëm për shkak të mundësive që ekonomia globale të shkojë drejt recesionit, si pasojë e rritjes së interesave nga bankat qëndrore, të cilat kanë marrë masa drastike për të luftuar inflacionin e lartë.

Edhe tregjet aziatike realizuan fitime më sesionin e parë të kësaj jave, ndërsa në Wall Street kontratat “futures” sinjalizojnë gjithashtu një tendencë në rritje. Investitorët po presin edhe takimin e G7-ës, që zhvillohet në Gjermani, ku presidenti amerikan Joe Biden i është bashkuar vendeve më të pasura të botës, si Kanadaja, Mbretëria e Bashkuar, Gjermania, Franca, Italia dhe Japonia.

Gjatë samitit 3-ditor, që nisi të dielën në mbrëmje, në fokus do të jetë lufta në Ukrainë dhe ekonomia globale. E ndërkohë, që liderët e G7-ës janë mbledhur në Gjermani, kryeqyteti i Ukrainës, Kievi, është goditur sërish nga raketat ruse.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.