Bursat europiane, në rënie të lehtë – Investitorët të fokusuar në Ukrainë, Rusia nis ofensivën në Donbas

Tregjet financiare në Europë janë hapur me ndryshime të vogla në sesionin e sotëm, ndërsa investitorët janë të fokusuar te zhvillimet e fundit që kanë të bëjnë më luftën mes Rusisë dhe Ukrainës. Indeksi pan-Europian STOXX 600 është hapur në rënie të lehtë me 0.2%. Zyrtarët e ushtrisë ukrainase deklaruan se, një ofensivë e madhe e Rusisë ka filluar në rajonin e Donbas, ndërsa sulmet janë intensifikuar në Slobozhansky dhe Donetsk, në veri dhe lindje të vendit.

Me konfliktin që nuk po jep shenja të zgjidhjes, Banka Botërore ka ulur parashikimin për rritjen ekonomike globale gjatë këtij viti, me thuajse 1 pikë të plotë përqindje, nga 4.1% që ishte vlerësimi i mëparshëm, në 3.2%. Banka Botërore citon presionin që pushtimi i Ukrainës nga Rusia po jep në ekonominë globale. Edhe tregjet aziatike patën një performancë mikse, gjatë sesionit të sotëm, ndërsa Banka Qendrore e Kinës njoftoi mbështetje financiare për sektorët e goditur nga vala e fundit e Covid-19.

Ndërkohë, Wall Street u mbyll në rënie të lehtë në sesionin e kaluar, ndërsa investitorët janë të pritje të fillimi të sezonit të raportimeve tremujore të korporatave. Në tregun e naftës, bençmarkët kryesorë po qëndrojnë në nivele të larta, me Brentin e Londrës që po tregtohet në rreth 113 dollarë për fuçi.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.