Bursat europiane vijojnë qëndrueshmërinë – Tregjet presin sanksionet shtesë ndaj Rusisë, mblidhen ministrat e NATO-s!
Tregjet europiane po ndryshojnë minimalisht edhe në sesionin e sotëm, për shkak të pritshëmrive se Rezerva Federale do të ndjekë një politikë më agresive me rritjen e interesave. Gjithashtu, investitorët janë në pritje edhe të sanksioneve shtesë që SHBA dhe BE do të vendosin ndaj Rusisë. Indeksi pan-Europian Stoxx 600 po qëndron në rritje të lehtë me 0.2%, ndërsa sektori i kujdesit shëndetësor realizon fitimet më të mëdha në rritje me rreth 1%.
Në anën tjetër, sektori i naftës dhe gazit është në rënie me rreth 1.2%. Wall Street u përball me shitje masive të aksioneve për të dytën ditë me radhë, për shkak se procesverbali i takimit të marsit të Rezervës Federale tregoi se, përveç rritjes së normave të interesit, zyrtarët vendosën edhe uljen e sasisë së blerjes së obligacioneve me rreth 95 miliardë dollarë.
Investitorët në të gjithë botën po ndjekin me interes edhe situatën e infektimeve me Covid-19 në Kinë, që ka detyruar autoritetet të vendosin kufizime strikte. Gjithashtu, investitorët po presin edhe detajet e raundit të ri të sanksioneve të vendeve perëndimore ndaj Rusisë, për shkak të provave potenciale se Moska ka kryer krime lufte në Ukrainë. Ministrat e jashtëm të NATO-s u mblodhën të mërkurën në Bruksel për një takim 2-ditor, ku po diskutojnë përgjigjen ndaj zhvillimeve të fundit në Ukrainë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.