Bursat “fshijnë” 3 trilionë dollarë! – Rriten shqetësimet për pandemi. Aktivet e sigurta, në rritje
Shmangia e rrezikut solli rënien e bursave botërore, duke e çuar humbjen në vlerë vetëm për këtë Javë në mbi 3 trilionë dollarë, si pasojë e përhapjes së shpejtë të koronavirusit jashtë Kinës. Numri i infeksioneve të reja në Kinë, që është origjina e epidemisë, u kalua për herë të parë nga rastet e reja jashtë vendit, duke rritur shqetësimet se koronavirusi mund të kthehet në një pandemi.
Indeksi stoxx 600 i Europës ra me 2.5% në sesionin e parafundit tregtar, ndërsa indeksi i Italisë, që është vendi më i goditur në Europë, u zhyt, ndërkohë që shumë kompani paralajmëruan mbi ndikimin e virusit tek aktivitetet e tyre. Në Shtetet e Bashkuara, Microsoft u bë kompania e dytë trilionë dollarëshe që paralajmëron për rezultatet pas Apple. Titujt botërorë të kapitalit kanë rënë për të 6-n ditë radhazi dhe treguesi i luhatjes së Wall Street preku nivelin më të lartë që prej 2018-s. Ari, që perceptohet si një aktiv i sigurt, u rrit në 1,649 dollarë për onz, pranë nivelit më të lartë në 7 vite.
Analistët thonë se metalet e çmuara dhe valutat e sigurta janë përfitueset kryesore. Jeni japonez dhe franga zvicerane u rritën në tregtinë e parafundit të javës. Valuta japoneze preku 110 kundër dollarit, në rritje me 2% për Javën. Bursa e Koresë së Jugut humbi 1.05% ditën e Enjte, duke u mbyllur në nivelin më të ulët në 4 muaj, ndërkohë që raportoi rritjen më të madhe ditore të të infektuarve, që kur u shfaq i pari muajin e kaluar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.