Bursat, luhatje minimale – Investitorët, në pritje të zgjidhjes së krizës në Spanjë

Bursat europiane po luhaten minimalisht edhe në sesionin e sotëm. Në njërën anë, investitorët i kanë mirëpritur të komentet e bankierëve qendrorë në takimin vjetor të Fondit Monetar Ndërkombëtar, por në anën tjetër, kujdesi është i lartë për shkak të situatës së tensionuar politike në Spanjë.

Indeksi pan-Europian, Stoxx 600, është thuajse i pandryshuar, me shumicën e sektorëve që publikojnë fitime modeste. Sektori i udhëtimeve realizon performancën më të mirë, ndërsa Lufthansa është në rritje me rreth 3%.

Kompania gjermane e udhëtimeve deklaroi se, do të nënshkruajë një kontratë me Air Berlin për të blerë një pjesë të aseteve të kësaj kompanie. Ky lajm ka bërë që edhe Easyjet të realizojë ndër performacat më të mirë në Bursën e Londrës.

Kryeministri i Spanjës, Mariano Rajoy, në një fjalim të mbajtur në parlament i dha 8 ditë kohë qeverisë së Katalonjës, për tu tërhequr nga pavarësia.

Nëse nuk ndodh një gjë e tillë, Rajoy do të pezullojë autonominë politike të qeverisë lokale të Katalonjës dhe kompetencat do të kalojnë te qeveria qendrore në Madrid.

Ndërkohë, në takimin vjetor të Fondit Monetar Ndërkombëtar, pritet të flasin autoritetet më të larta të financave globale, duke përfshirë edhe presidentin e BQE, Mario Draghi.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.