Bursat më të mëdha në botë – Kina i lë vendin e dytë Japonisë prej luftës tregtare

Kina ka humbur statusin si tregu i dytë më i madh në botë i aksioneve. Pas një rënieje këtë javë, titujt e kapitalit në Kinë vlenin 6.09 trilionë dollarë, sipas Bloomberg. Japonia, arrinte një total prej 6.17 trilionë dollarë, ndërsa Shtetet e Bashkuara, që është tregu më i madh i aksioneve në botë, në mbi 31 trilionë dollarë.

Tregu i aksioneve i Kinës tejkaloi Japoninë në fund të 2014-ës dhe preku nivelin më të lartë të të gjitha kohërave prej më shumë se 10 trilionë dollarë në Qershor të 2015-ës.  Aksionet dhe valuta kineze kanë marrë goditje këtë vit nga lufta tregtare me SHBA, përpjekjet e qeverisë për të ulur borxhin dhe ngadalësimi ekonomik.  Indeksi i titujve të kapitalit të Shangait, ka humbur 17% në vitin 2018, duke u kthyer në performuesit më të këqij në botë. Aksionet industriale dhe të teknologjisë brenda CSI 300 kanë  patur performancën më të dobët,  duke humbur më shumë se 20% të vlerës.

Humbja në renditje përbën një kujtesë për Kinën se roli i vetë në tregjet financiar global, pavarësisht se i madh, nuk i përputhet ende fuqisë ekonomike. Politikëbërësit kanë premtuar se do të hapen ndaj ekonomisë botërore, duke hequr limitet e investimeve në industri nga bankingu e deri te bujqësia. Megjithatë, zotërimi i huaj i titujve të kapitalit dhe të borxhit qëndron i ulët.  Sasia totale që juani kinez zë në pagesat globale ka rënë në 1.81% në Qershor nga 1.88% një muaj më parë.

Ndërkohë që indeksi  i titujve të kapitalit në Japoni, Topix ka rënë me më shumë se 4% deri më tani për vitin, mbetet një nga tregjet me performancën më të mirë në Azi.  Kjo vjen prej blerjes nga Banka e Japonisë në fondet e listuara në bursë (ETF) dhe ndërkohë që shumë kompani kanë publikuar rezultate të forta.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.