Bursat rikthehen në rënie – Java më e keqe që prej 2011-ës, “Dow” humb 2 herë sipër 1,000 pikëve

Kjo javë ka qenë famëkeqe për tregjet e kapitalit në të gjithë botën.  Ndërkohë që e mërkura tregoi shenja të rimëkëmbjes,  bursat u përmbysën në tregtinë e fundit të kësaj jave, duke i çuar indekset në SHBA në territorin e korrigjimit.

Duke matur S&P 500 dhe Dow Jones, 5 trilionë dollarë janë fshirë nga bursat globale që prej datës 26 Janar. Indeksi S&P 500 ka fshirë të gjithë akumulimin për 2018-n, dhe ka treguar javën më të keqe që prej vitit 2011.

Dow Jones ndërkohë, ka rënë me më shumë se 1,000 pikë për të dytën herë në vetëm 4 ditë. Tregtarët e titujve të kapitalit janë ende të shqetësuar nga rritja e interesave të borxhit në SHBA, që kanë prekur nivelin më të lartë në 4 vite.

Presionet në SHBA erdhën nga tregu i Thesarit, ku yield-i i titujve 10-vjeçar arriti në 2.88%. Investitorët e aksioneve shqetësohen se rritja e kostove të huamarrjes do të ndikojë te të ardhurat e korporatave dhe te fuqia shpenzuese e konsumatorit.

Humori u përhap edhe në tregtinë aziatike, ku indekset në Japoni dhe Korenë e Jugut u mbyllën në rënie me më shumë se 2%. Kina pati rënien më të madhe, ndërkohë që indeksi i Shangait humbi thuajse 5% gjatë sesionit të fundit tregtar për këtë javë.

Bursat europiane nuk patën një rënie kaq të mprehtë, por të gjithë indekset e nisën sesionin tregtar të së Premtes në territor negativ, ndërkohë që investitorët po monitoronin trazirat në tregjet globalë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.