Bushati në Bruksel: 2018, një vit i rëndësishëm për Shqipërinë dhe rajonin
Viti 2018 është i rëndësishëm për integrimin e Shqipërisë dhe rajonit, nënvizoi ministri për Evropën dhe Punët e Jashtme, Ditmir Bushati, gjatë vizitës zyrtare në Bruksel, ku mori pjesë në drekën e punës me ministrat e jashtëm të vendeve anëtare dhe kandidate të BE-së.
“Viti i ardhshëm është i rëndësishëm për ne dhe rajonin dhe ne kemi treguar vazhdimisht vendosmëri dhe konsistencë në orientimin tonë Euro-Atlantik”.
Ministri Bushati vlerësoi mbështetjen e vendeve anëtare dhe nënvizoi se ‘arritjet e deritanishme të Shqipërisë në procesin e reformave që lidhen me integrimin evropian përbëjnë një bazë të shëndoshë për punën e mëtejshme në kuadrin e negociatave të anëtarësimit’.
Ministrat e Jashtëm vlerësuan përkushtimin në vazhdimësi të Shqipërisë për axhendën e reformave dhe nënvizuan rëndësinë e rezultateve në reformën në drejtësi për ecurinë e integrimit evropian të vendit.
Një vlerësim i lartë u shpreh për rolin e Shqipërisë në rajon si një partner pro-aktiv dhe konstruktiv. Gjithashtu, gjatë takimit u vlerësua edhe qëndrimi i Shqipërisë në kuadër të nismave rajonale si dhe marrëdhëniet konstruktive dhe të fqinjësisë së mirë në rajon.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.