Buxheti 4.8 trilionë dollarë i Trump – Përballet me kritika. Ul shpenzimet në shëndetësi dhe mirëqenie
Plani buxhetor prej 4.8 trilionë dollarë i presidentit Donald Trump u përball me refuzime nga demokratët në Kongres, që thonë se ka shkelur premtimin e tij për të mbrojtur programet e shëndetësisë dhe të mirëqenies sociale. Shtëpia e Bardhë e prezantoi buxhetin si një strukturë të prioriteteve politike të presidentit. Këtu përfshihet financimi për murin në kufi me Meksikën dhe lufta e krizës së opioideve. Megjithatë, plani shkurton miliarda dollarë nga programet e luftimit të varfërisë, nën reformën e mirëqenies sociale.
Në përpjekje për të ulur borxhin dhe deficitin, Trump propozoi përsëri ulje të mëdha të financimit në strehim, mjedis, transport dhe programe të tjera, që janë refuzuar nga politikanët në vitet e kaluara. Përfaqësuesit e Shtëpisë së Bardhë bënë të ditur se këto buxhete do të vazhdojnë të prezantohen, me shpresën që një ditë Kongresi të kuptojë se duhet trajtuar borxhi dhe deficiti. Demokratët thanë se propozimi i Trump shkel premtimin e tij gjatë fjalimit mbi gjendjen e kombit, ku tha se do të mbrojë gjithmonë planin e sigurisë sociale dhe planin Medicare të shëndetësisë për të moshuarit.
“Kujdesi shëndetësor i përballueshëm dhe cilësor i amerikanëve, nuk do të jetë kurrë i sigurt me Donald Trump”, tha kryetarja e dhomës së përfaqësuesve, Nancy Pelosi. Buxheti i Trump do ulë shpenzimet tek Medicare, duke shkurtuar kostot e barnave dhe ngushtuar papranueshmërinë për programin personave me aftësi të kufizuar. Shpenzimet e Trump në agjencitë e brendshme si Departamenti i Edukimit dhe Agjencia e Mbrojtjes së Mjedisit do të jenë 6% poshtë kufirit të rënë dakord më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.