Buxheti dhe paketa fiskale 2018 – Bode: Pozitiv për qeverinë, jo për qytetarët

Projektbuxheti i vitit të ardhshëm i cili po diskutohet në Kuvend, është pa problem për qeverinë, por nuk është buxhet që mbështet qytetarët. Kështu u shpreh në një intervistë për TV SCAN, ish-ministri i Financave, Ridvan Bode. Sipas tij, hartimi i këtij buxheti është real në pikëpamjen e administrimit, por nuk ka ndikim pozitiv tek qytetarët dhe te ekonomia.

“Në tërësinë e tij unë e konsideroj një buxhet në vetvete pa probleme në realizimin e tij pasi është i kujdesshëm në projeksione, por nga ana tjetër shikoj një buxhet i cili mbyllet vetëm në interesin e qeverisë dhe nuk tenton të hedhë një këndvështrim mbi ekonominë reale dhe aq më pak mbi qytetarët. Është një buxhet realist, një projeksion realist nisur nga faktet e këtij viti. Në vetvete sigurisht qeverisë nuk i lë shumë marzh të lirë veprimi për të gjithë ato që deklaron apo ato që ka dëshirë t’i bëjë qeveria. Buxheti në raport me ekonominë dhe me qytetarët tërësisht i izoluar dhe nuk merr në konsideratë asnjë nevojë, as të ekonomisë, as qytetare”, u shpreh Bode.

Ndërsa referuar paketës fiskale, ish-ministri thotë së do të rëndohen qytetarët, sidomos nga ndryshimi i formulës së përllogaritjes së taksës së pronës.

“Taksa e banesave, dyfishimi i saj sigurisht që do të impaktojë, pavarësisht se është një taksë mbi pronën e konceptuar tek ne, por duke u nisur që buxheti familjar tek ne është shumë kompleks, do të thotë një prekje e drejtpërdrejtë e konsumit të familjeve. Sepse me ato të ardhura që disponon familja duhet të paguajë për shtëpinë e saj një taksë edhe më të madhe, çka do të thotë se do të ulet mundësitë dhe pjesa e buxhetit familjar që destinohet për të aksesuar tregun, për blerjen e ushqimeve dhe jetesës së përditshme të qytetarëve”, shtoi Bode.

Diskutimet mbi buxhetin dhe paketën fiskale tashmë janë përqendruar jo vetëm në kuvend, por edhe në qarqet ekonomike, biznes dhe opinion publik.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.