Buxheti federal i SHBA – Trump synon të shkurtojë 3.6 trilionë dollarë

Presidenti i Shteteve të Bashkuara Donald Trump, i kërkoi ligjbërësve që të shkurtojnë 3.6 trilionë dollarë shpenzime qeveritare në dekadën që vjen, duke shënjestruar programet e kujdesit shëndetësor dhe asistencës ushqimore për të varfërit.

Republikanët që kontrollojnë Kongresin e Shteteve të Bashkuara, do të vendosin nëse do të pranojnë uljet e shpenzimeve, megjithatë, propozimi nuk ka gjasa të miratohet në formën aktuale.

Kursimet më të mëdha do të vijnë nga uljet e shpenzimeve në programin e kujdesit shëndetësor për të varfërit “Medicaid”.

Trump kërkon që ligjbërësit të shkurtojnë të paktën 610 miliardë dollarë nga Medicaid dhe më shumë se $192 miliardë nga asistenca ushqimore në një dekadë.

Ai kërkon të balancojë buxhetin brenda dhjetë viteve. Kritikët thonë se plani përfshin shkurtime jo-realiste dhe supozime të gabuara se rritja ekonomike do të arrijë 3% në fund të mandatit të tij.

Shtëpia e Bardhë deklaroi se uljet e propozuara të taksave do të nxisin rritjen ekonomike dhe se të ardhurat nga këto do të arrijnë 2 trilionë dollarë në 10 vite.

Lawrence Summers, ish-këshilluesi mbi ekonominë i presidentit demokrat Barrack Obama, tha se ky është gabimi më i madh kontabël në një buxhet presidencial në thuajse 40 vite.

Ndihmat federale ndaj shteteve do të reduktohen me 3%, megjithatë shkurtimet do të jenë më të rënda për shtetet që votuan Clinton.

Pentagoni do të ketë një rritje të shpenzimeve, ndërsa 1.6 miliardë dollarë do të shkojnë për ndërtimin e murit në kufirin me Meksikën, që është premtimi kryesor i Trump gjatë fushatës.

Propozimet e Trump përfshijnë edhe shitjen e gjysmës së rezervave emergjencë të naftës, të krijuara në vitin 1975 prej shqetësimeve për një rritje gjigante në çmime.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.