Buxheti i BE – Juncker flet për rritje të shpenzimeve, pavarësisht daljes së Britanisë

Komisioni Europian bëri thirrje për një buxhet të zgjeruar që do të mbulojë më shumë shpenzime në mbrojtje, siguri dhe kontrollin e emigrimit, pavarësisht daljes së Britanisë, një nga paguesit më të mëdhenj në buxhetin e bllokut.

Presidenti i Komisionit Jean-Claude Juncker tha se Bashkimi Europian i kushton taksapaguesve më pak se një filxhan kafe në ditë. Shefi i buxhetit, komisioneri gjerman, Guenther Oetttinger, tha se financimi në Bruksel duhet të rritet nga niveli aktual prej 1% të të ardhurave kombëtare bruto në bllok, në sipër 1.1%.

Shpenzimet kombëtare publike në Bashkimin Europian janë 40 herë më të mëdha se ai nivel. Dalja finale e Britanisë nga buxheti i Bashkimit Europian në fund të vitit 2020, do t’i kushtojë Brukselit thuajse 12 miliardë euro nga buxheti vjetor që arrin tashmë në rreth 140 miliardë euro.

Ky hendek ka nisur shqetësimet në kontribuues të tjerë neto në perëndim, që kanë thënë se nuk duan të kompensojnë për daljen e Britanisë, ndërsa ish-vendet komuniste të lindjes thonë se nuk duhet që të pësojnë shkurtime në subvencione të BE-së.

Komisioni kërkon që të mbulojë hendekun e Britanisë, shtuar shpenzime të tjera, nëpërmjet një kombinimi të kursimeve në disa fusha dhe burimeve të reja të të ardhurave.

Juncker tha se kosto e manaxhimit të problemeve me emigrimin në Mesdhe si dhe programet e reja mbi mbrojtjen dhe investimet e përbashkëta, kërkojnë më shumë financim, sipër 1%-shit aktual.

Oettinger tha se Politikat e Përbashkëta Bujqësore dhe shpenzimet në kohezionin rajonal, do të duhet të shkurtohen, por jo në mënyrë drastike. Kreu i ministrave të financave të Eurozonës, Mario Centeno, tha se vendimi për të limituar pagesat vjetore në 1% të të ardhurave kombëtar bruto duhet të rivlerësohet.

Ndër burime të mundshme të të ardhurave ai përmendi tatimin e korporatave, tatimin mbi vlerën e shtuar, si dhe taksat mbi energjinë dhe transport.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.