Buxheti për shëndetësinë – Grupet e interesit: Të këtë përfitime konkrete për pacientët
Buxheti i Shëndetësisë për vitin 2018 është konsultuar edhe me grupet e interesit të cilët kanë ngritur problematika që e shoqërojnë këtë buxhet. Përfaqësuesja e shëndetësisë nga Avokati i Popullit, Lindita Xhillari, ka sjellë në vëmendje të Komisionit Parlamentar se duhet që në këtë buxhet të parashikohen zgjidhje konkrete sa iu përket mungesës së mjekëve në rrethe, mungesës së aparaturave mjekësore dhe barnave.
“Po specifikoj shkurtimisht rekomandimet që institucioni i Avokatit të Popullit ka specifikuar Ministrisë së Shëndetësisë, pikërisht me objekt investimet që kanë rol pastaj drejtpërdrejt në buxhet. Për spitalin e Kurbinit, mungesë mjekësh pediatër, gjinekologë, mungesë sistemi ftohës për muajt e verës, këtë rekomandim e kemi pa përgjigje nga Ministria. Spitalet Kukës dhe Tropojë, mungesë mjekësh specialistë, aparaturash mjekësore dhe rinkonstruksione të godinave pasi janë në gjendje të amortizuar. Vlen të theksohet se më problematike ka qenë mungesa e citostatikëve në spitalin onkologjik në Qendrën Spitalore Universitare”, tha Xhillari.
Një tjetër problematikë e ngritur në Komisionin Parlamentar të Shëndetësisë ka të bëjë me testet gjenetike për fëmijën me Sindromën Down. Sipas përfaqësuese së Shoqatës për fëmijët me sindromën Down, Emanulela Zaimi, mjekët e spitaleve shtetëror drejtojnë tek privati për këtë analizë e cila kushton 40 mijë lekë. Një analizë kjo që sipas mjekut dhe deputetit Halim Kosova është ofruar në shtet falas, por që ka abuzime nga personeli mjekësor e në të njëjtën kohë edhe mungesë të kiteve.
“Analiza gjenetike e kariotipit, e cila nuk është e mundur që të bëhet në Shqipëri. Ne si prindër, pasi na lind një fëmijë me sindromën Down duhet të bëjmë këtë analizë, e cila vërteton plotësisht sindromën down dhe pa përgjigjen e së cilës ne nuk paraqitemi dot në komisionet e KMCAP-së, sepse nuk kemi të drejtën e marrjes së pagesës. Deri më tani është bërë jashtë në klinika private dhe ka një kosto që fillon nga e pakta 400 mijë lekë të vjetra”, sqaroi Zaimi.
“Deri në 2013-ën këto bëheshin falas. Një laborator i falur nga kompani shqiptare, i hapur me iniciativën e një fondacioni shumë të nderuar në vendin tonë, të kthehet në pagesa me pacientët, për mua është një lajm shumë i keq. Dhe po jua them dhe këtë, që nëqoftëse një familjar e merr gjakun e fëmijës dhe e poston në një qendër nga më të mëdhatë në Itali, kostoja nuk është më shumë se 80-90 euro. Këtë e them me përgjegjësi të plotë, për 3 defekte shumë të rëndësishme. Nëqoftëse çmimi që më thoni ju është i vërtetë, kjo tregon shkallën e abuzimit midis personelit mjekësor në kurriz të njeriut hallexhi”, tha Kosova.
Përfaqësuesit e Ministrisë së Shëndetësisë u zotuan se do të rishikojnë mundësinë e rimbursimit të kësaj analize duke qenë se edhe numri i rasteve në një vit në vendin tonë është në rreth 25-30. Një shqetësim tjetër i sjellë në komisionin e Shëndetësisë ka të bëjë me “zhdukjen” e mjekësisë së punës. Ndërsa referuar buxhetit të shëndetësisë kreu i shoqatës së Talasemikëve në Shqipëri e cilësoi si buxheti më i ulët në vendet e Ballkanit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.