Buxheti i ri/ Qeveria kalon në Kuvend ndryshimet për pagesat e veteranëve

Kryeministri i Republikës së Kosovës, Ramush Haradinaj në bashkëpunim me Ministritë përkatëse thonë se kanë kryer të gjitha procedurat për pagesat e veteranëve, ndërkohë tashmë çështja është në kompetencën e Kuvendit të Republikës së Kosovës që ta rishqyrtojë buxhetin në afat optimal.

“Sa i përket borxhit për këtë vit (gusht deri dhjetor 2017) Qeveria i ka siguruar fondet dhe ka proceduar në Kuvendin e Kosovës ndryshimet e buxhetit dhe pret që deputetët të votojnë këto ndryshime sa më shpejt dhe pensionet të paguhen në mënyrën e duhur”, thuhet në njoftimin e Qeverisë së Kosovës

Sa i përket shqetësimit të veteranëve të UÇK-së për mos-pagesën e pensioneve, drejtori i Zyrës për Çështjet e Kategorive të dala nga Lufta, në Zyrën e Kryeministrit, Gazmend Syla, ndjen keqardhje që Qeveria e kaluar nuk ka ndarë buxhet të mjaftueshëm për Veteranët e Luftës. Gjithashtu Syla siguron veteranët se “Qeveria Haradinaj do të ndajë buxhetin për vitin 2018, për pagesën e pensioneve për 12 muaj, pa ndërprerje, për këto kategori”, thuhet më tej në njoftim.

Ditë më parë veteranët e UÇK-së kanë protestuar për pensionet para ndërtesës së Qeverisë dhe Kuvendit të Kosovës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.