Buxheti i shërbimit spitalor rritet me 630 milionë lekë – QSUT merr 1 miliard lekë më shumë
Këshilli i Ministrave ka vendosur për rritjen e buxhetit të shërbimit spitalor për vitin 2017. Përmes një vendimi që bën amendime në VKM e datës 1 Janar 2017, totali i vlerës së financuar shkon në 19.5 miliardë lekë, 630 milionë lekë më shumë nga sa ishte parashikuar në fillim të vitit.
Rritja e këtij buxheti duket se është bërë që institucionet shëndetësore të përballojnë rritjen e pagave për mjekët, pasi në këtë zë dhe atë të kontributeve shoqërore, të gjitha spitalet në vend kanë një rritje të ardhurash nga shteti.
Rritja më e madhe i takon Qendrës Spitalore Universitare Nënë Tereza në Tiranë, për të cilën buxheti tashmë arrin në 6.28 miliardë lekë, nga 5.24 miliardë lekë në vendimin e mëparshëm. Shtimi i buxhetit për këtë institucion është mundësuar edhe nga ulja e fondeve për “Paketat e Shërbimeve” me 700 milionë lekë.
Pjesa tjetër e rritjes është e shpërndarë në proporcion me numrin e punonjësve, të cilët në rang vendi janë 12 016 veta.
Qeveria publikoi një shtesë pagash për punonjësit e shëndetësisë në muajin Mars të këtij viti, ndërsa në Prill u prezantua edhe një skemë e re financimi për të stimuluar mjekët të qëndrojnë sa më pranë pacientëve, duke i shpërblyer me bonus 10 mijë lekë në ditë për mjekët e spitaleve Universitare që do të kryejnë konsulta apo ndërhyrje kirurgjikale në spitalet Rajonale në ditë të caktuara.
Në fillim të Shtator, Kryeministri Rama zbuloi edhe propozimin për të nxitur mjekët specialistë që punojnë pranë spitaleve rajonale ose bashkiake jashtë Tiranës, duke u ofruar një pagë të përafërt me atë të vendeve europiane.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.