Bypass-i Fier e Vlorë – Basha: Pagat të paguhen nga garancia. Qendro: Jemi ende në gjyq
Punëtorët e bypass-it të Fierit dhe Vlorës kanë protestuar para Kuvendit për të kërkuar pagat e pashlyera. Ndërkohë që, me protestuesit u bashkua dhe kreu i opozitës, Lulzim Basha, i cili tha se pagesa e garancisë së kompanisë që ka kryer punimet, do të mjaftonte për të shlyer borxhet, po ajo nuk kryhet për shkak të korrupsionit.
“Sipas informacionit tonë kjo pagesë nuk kryhet sepse ka korrupsion, korrupsion qeveritar dhe korrupsion kryeministror. Janë me dhjetëra telefonata midis zyrës së kryeministrit dhe zyrtarëve më afër kryeministrit dhe kontraktorit, ish kontraktorit të cilat fshehin një aferë të pistë korruptive. Por po kështu ne kemi ngritur dhe do të ngremë zërin që një orë e më parë këto fonde të zhbllokohen që pagesat që ju detyrohet shteti përmes kësaj garancie, sepse garancia për këtë punë ëhstë dhënë, të kryhen.”
Pas këtyre akuzave ka regauar kreu i Autoriteti Rrugor Shqiptar, i cili tha se institucioni që ai drejton është në gjyq me firmën për garancinë e kontratës, por ajo është e bllokuar për shkak se çështja është ende në proces.
“Autoriteti Rrugor me kompaninë “Serenissima” ëhstë në gjyq. Jemi në 3 gjyqe sepse jemi në gjyq për paradhënien dhe garancinë e kontratës dhe për garancinë e kontratës tek njëri bypass. Nuk kemi ne një përfundim të asnjërit prej proceseve gjyqësore dhe garancitë që ka vendosur firma “Serenissima” për ndërtimin e këtyre dy bypasseve janë akoma të bllokuara në bakë sepse jemi ende në proces gjyqësor.”
Punimet në bypass-in e Fierit dhe Vlorës u zvarritën prej vitesh, ndërkohë që në prill të vitit 2017 Autoriteti Rrugor Shqiptar anuloi në mënyrë të njëanshme kontratat e lidhur me kompaninë italiane “Serenissima Construzioni”, duke e konsideruar si të patolerueshme zgjatjen e mëtejshme të afateve të ndërtimit të dy nga veprave serioze infrastrukturore rrugore.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.