Cakaj për sistemin e ri ETIAS: Nuk është rikthim i vizave, por procedurë lehtësuese– Shqiptarët do vazhdojnë të lëvizin lirshëm
Lidhur me sistemin e ri të qarkullimit ndërkufitar në Bashkimin Evropian, ETIAS, që është interpretuar si rikthim vizash për Shqipërinë, zv. Ministri i Jashtëm Gent Cakaj ka thënë se është një procedurë e zakonshme që është parashikuar me kohë nga Bashkimi Evropian.
“ETIAS është thjesht një formular online që lehtëson autorizimin e lëvizjes për brenda disa minutash” është shprehur zv.Ministri.
“Për më tepër, ka vazhduar ai, sistemi nuk do aplikohet vetëm për Shqipërinë, por edhe për vende si SHBA apo Kanadaja.”
Në fund të fjalës Z.Cakaj gjithashtu ka thënë se sistemi nuk do aplikohet në janar të 2021 por në vitin 2023, edhe pse kjo gjë nuk është vendosur akoma.
Fjala e plotë:
Fillimi i zbatimit të sistemit ETIAS nuk ka asnjë lidhje me rivendosjen e vizave për shtetasit shqiptar. Sidoqoftë, duke marrë parasysh shkallën e lartë të lajmeve të rreme këto ditë, sqarimi i tre gjërave me rëndësi është i nevojshëm:
E para, këtu s’bëhet fare fjalë për rikthim vizash, por vetëm për plotësim të një formulari online që do të ofrojë autorizimin për udhëtim brenda pak minutash.
E dyta, këtu s’bëhet fare fjalë për masë të veçantë enkas për Shqipërinë, por për një procedurë të zakonshme për një listë të gjatë shtetesh, përfshirë Shtetet e Bashkuara të Amerikës, Kanadanë, Australinë dhe të gjitha vendet e Ballkanit Perëndimor.
E treta, këtu s’bëhet fare fjalë për hyrjen në fuqi të kësaj praktike nga data 1 janar 2021. Ky sistem pritet të hyjë në fuqi nga data 1 janar 2023, por edhe kjo çështje mbetet e hapur marrë parasysh disa faktorë të brendshëm rrethanorë.
Me një fjalë, përtej botës virtuale të lajmeve të pasakta, një gjë është fare e qartë dhe e sigurtë: shtetasit e Republikës së Shqipërisë do të vazhdojnë ta gëzojnë lëvizjen e lirë dhe pa pengesa në hapësirën e Bashkimit Evropian.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.