Caktohen çmimet për bizneset e liberalizuara – Fatura për janar-mars/Tensioni 10 dhe 6 KV do e paguajë më shtrenjtë se 18.8 lekë/kwh
Bizneset që kanë dalë në treg të lirë do ta paguajnë më shtrenjtë faturën e energjisë për 3 muajt e parë të këtij viti. Nga ky vendim do të preken bizneset e lidhura me linjën e tensionit 10 dhe 6 kilovat.
Bizneset e lidhur në tensionin 10 dhe 6 KV që kanë dalë në treg të lirë energjie do e paguajnë më shtrenjtë energjinë për 3 muajt e parë të këtij viti, ndonëse janë faturuar nga Furnizuesi i Mundësisë së Fundit me 18.8 lekë/kwh. Enti Rregullator i Energjisë ka miratuar çmimet për këtë kategori biznesesh, duke përcaktuar se do të faturohen me 19.69 lekë/kwh, çka do të thotë se mes palëve do të lëshohet një faturë me të gjithë kompensimet për diferencat. Ndërkaq, për bizneset e lidhur në tensionin 20 KV çmimi nuk ka ndryshim.
Për këtë kategori biznesesh, që dolën në tregun e liberalizuar në muajin janar të këtij viti Furnizuesi i Shërbimit Universal e siguron energjinë nga KESH, me një çmim fiks prej 12 lekë/kwh. Ndërkohë që, për klientët e lidhur në tensionin 35 KV energjia sigurohet nga importi, çka bën që kjo kategori klientësh të faturohet shumë shtrenjtë
Paralelisht kreu i Shoqatës së Furnizuesve kërkoi gjatë mbledhjes së ERE-s, që edhe furnizuesit alternativë të kenë akses për të blerë pranë KESH energji me 12 lekë/kwh. Sipas tij kjo do të ndihmojë në ofrimin e disa mundësive të furnizuesve, duke sjellë edhe çmime më të ulta për këtë kategori konsumatorësh. Aktualisht, në tregun e liberalizuar janë rreth 7500 biznese.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.