Carney flet për Brexit: “Të dy palët e kuptojnë rëndësinë e një periudhe tranzicioni”

Guvernatori i Bankës së Anglisë, Mark Carney tha se ka një mirëkuptim mes Britanisë dhe Europës mbi rëndësinë e arritjes së një marrëveshjeje tranzitore për Brexit dhe një dakordësi të mirë mbi investimet dhe tregtinë pas kësaj.

“Qeveria, bizneset dhe njerëzit si në Britani edhe në Europë, e kuptojnë se është në interes të të gjithëve arritja e një periudhe tranzicioni ndaj marrëdhënies së re”, tha Carney.  Sipas tij është gjithashtu gjerësisht e kuptueshme nevoja e një partneriteti gjithëpërfshirës të tregtisë dhe investimeve mes Mbretërisë së Bashkuar dhe 27 vendeve anëtare në fund të këtij tranzicioni.

Carney ka argumentuar prej kohësh se kjo periudhë e synuar do të ndihmojë në zbutjen e efekteve të daljes nga unioni dhe në reduktimin e rrezikut të një goditjeje ndaj ekonomisë së 5-të më të madhe në botë, pas Marsit 2019.

Progresi i ngadaltë në bisedime ka shqetësuar shumë biznese, që kanë paralajmëruar se nëse nuk arrihet periudha e tranzicionit, do të nisin planet e emergjencës, përfshirë këtu daljen prej Britanisë.

Carney tha se Banka e Anglisë do të përdorë çdo mundësi për të mbështetur ekonominë gjatë kësaj periudhe,  në çfarë do lloj rezultati që do të kenë bisedimet. Më herët gjatë muajit Banka e Anglisë veproi duke rritur normën e interesit për të parën herë në 10 vite, duke bërë të ditur se pret që rënia e madhe e papunësisë do të nxisë nivelin e çmimeve, që e ka kaluar objektivin e institucionit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.