Cash-i, “nëna” e problemeve – Pedrazzi: Të kufizohen pagesat me para në dorë
Bankat kërkojnë nga qeveria shqiptare të kufizojë përdorimin e parasë cash në ekonomi.
Gjatë takimit të ditës së mërkurë me gazetarët, kryetari i Shoqatës Shqiptare të Bankave, Silvio Pedrazzi, tha se thelbi i problemeve që lidhen me sigurinë është qarkullimi i lartë i parasë cash. Ai theksoi se Shqipëria ka një nivel shumë të lartë të përdorimit të cash-it, qoftë edhe krahasuar me vendet e rajonit, çka sjell kosto të mëdha shtesë për të gjithë ekonominë.
Bankat tregtare, por edhe Banka e Shqipërisë e Fondi Monetar Ndërkombëtar, kërkojnë që përpjekja për të ulur euroizimin e ekonomisë të mbështetet me masa konkrete nga qeveria shqiptare. Këto masa duhet të kufizojnë përdorimin e euros si valutë për pagesat e brendshme në ekonomi. Ndërkohë, bankat kërkojnë që këto masa të kenë një spektër edhe më të gjerë, me qëllim uljen e përdorimit të parasë cash. Shoqata e Bankave propozon që limiti i lejuar për pagesa cash nga biznesi të përgjysmohet, nga kufiri 150 mijë lekë që është aktualisht. Gjithashtu, ata kërkojnë që i njëjti limit prej rreth 75 mijë lekësh të vendoset edhe për blerjet e individëve.
Një masë e tillë, përveçse do të ndihmonte në uljen e informalitetit, do të reduktonte ndjeshëm kostot e larta që ekonomia shqiptare ka nga përdorimi i parasë cash. Një studim i Bankës Botërore tregon se përdorimi i lartë i cash-it i kushton Shqipërisë rreth 1.5% e Prodhimit të Brendshëm Bruto. Kjo përfshin kostot e transportit, administrimit, ruajtjes apo rreziqeve. Në vlerë absolute, bëhet fjalë për rreth 25 miliardë lekë ose rreth 200 milionë euro, që ekonomia shqiptare do t’i kursente, nëse do të përdorte pagesa në rrugë bankare dhe sidomos pagesa elektronike.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.